Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 534 Hüküm no: 731 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mehmed’in, Nikola v. Todari’de yağ bedelinden olan alacak davasında sulh olduğu Ma‘rûz Sahib-i arzuhâl Derviş Mehmed meclis-i şer‘de derûn-ı arzuhâlde mastûr<<ü’l-esâmî>>ü’l-ism Nikola v. Todori nâm zimmî muvâcehesinde mesfûr Nikola târih-i i‘lâmdan sekiz ay mukaddem yedimden iştir[â] ve kabz eylediği beher vakıyyesi kırkar akçeye olmak üzere iki yüz on iki vakıyye revgan-ı çerviş semeni olan sekiz bin dört yüz seksen akçeden üç bin altı yüz altmış akçesini mesfûr yedinden ba‘de’l-kabz dört bin sekiz yüz yirmi akçem zimmetinde bâkī kalmağla meblağ-ı bâkī-i mezkûru mesfûr Nikola’dan taleb ederim deyü da‘vâ eylediğimde ol dahi ol mikdâr revgan-ı çerviş iştirâsını ikrâr lâkin revgan-ı mezkûr ziyâde redî olmağla beher vakıyyesini yirmi dörder akçeye iştirâ etmişidim ve beş bin iki yüz seksen akçe teslîm eyledim deyü beynimizde ba‘de vukū‘ı’l-münâza‘a bâ-vesâtet-i muslihîn müdde‘âm olan dört bin sekiz yüz yirmi akçeden merkūm Nikola ile bin akçe bedel-i makbûza sulh olup mâ‘adâsına müte‘allika âmme-i da‘vâdan herbirimiz âharın zimmetini ibrâ ve ıskāt eyledik deyü olan ikrârını mesfûr Nikola dahi tasdîk eylediği Mahkeme-i Bâb’da tescîl ve huzûr-ı âlîlerine i‘lâm olundu bâkī emr ü fermân men-lehu’l-emrindir. Fî 14 Ca sene 1163