Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 536 Hüküm no: 734 Orijinal metin no: [95a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in kızlara Ayşe’nin biriken nafaka bedelinin ödenmesi talebiyle boşandığı kocası Hasan b. Mustafa’ya açtığı davada sulh olduğu Ma‘rûz Zâtı ta‘rîf-i şer‘î ile mu‘arrefe olan sahibe-i arzuhâl Hadîce bt. Mehmed nâm hatun meclis-i şer‘de zevc-i sâbıkı olup derûn-ı arzuhâlde mezkûrü’l-ism tabbâhîn-i hâssadan Hasan b. Mustafa mahzarında mezbûrun firâşından hâsıla ve benden mütevellide bi-hakkı’l-hıdâne hacr u terbiyemde olan işbu sagīre kızım Âişe’nin beher şehr ikişer guruş nafaka-i mefrûza-i müstedânesinden târih-i i‘lâma gelince üç senede yetmiş iki guruş müctemi‘a olmuşidi taleb ederim deyü da‘vâya tesâddî eylediğimde ol dahi tamamen edâ etmişidim deyü ba‘de’d-def‘ ve’l-münâza‘a da‘vâ-yı mezkûremden merkūm Hasan ile bâ-vesâtet-i muslihîn sekiz guruş ve bir rub‘ guruş bedel-i makbûza sulh olup mâ‘adâsına müte‘allika âmme-i da‘vâdan mezbûr Hasan’ın zimmetini ibrâ ve ıskāt eylediğimde ol dahi ibrâ-i mezkûru ba‘de’l-kabûl bu vechile kat‘-ı nizâ‘ eyledik deyü olan ikrârını mezbûr Hasan dahi tasdîk eylediği Mahkeme-i Bâb’da tescîl ve huzûr-ı âlîlerine i‘lâm olundu bâkī emr ü fermân hazret-i veliyyü’l-emrindir. Fî 19 min-Cumâdelûlâ sene 1163