Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 92 Hüküm no: 62 Orijinal metin no: [16a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kütahya’daki İshak Fakih Evkafı’nın dörtte bir hisse kitabet cihetinin Şerif Halil’e tevcihi Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda Kütahya’da medfûn İshak Fakih Evkāfı’nın yevmiye iki akçe vazîfe ve senevî üç müd galle ile nısf hisse kitâbet cihetine bi’l-iştirâk mutasarrıflar Şerif Mahmud ve Şerif Halil ibneyn es-Seyyid Hâfız Ebûbekir nâm karındaşlardan mezbûr Şerif Mahmud bilâ-veled fevt olup yeri hâlî kaldığından bahisle müteveffânın mutasarrıf olduğu rub‘ hisse kitâbet ciheti kendüye tevcîh buyurulmak bâbında karındaşı ve müştereki sahib-i arzuhâl mezbûr Şerif Halil dâ‘îleri istid‘â-yı inâyet eder, fi’l-hakīka cihet-i mezkûre bâ-berât-ı âlî mezbûrânın üzerlerinde olduğu askerî rûznâmçesi derkenârından müstebân ve mezbûr Şerif Mahmud bilâ-veled fevti vâki‘ ve sahib-i arzuhâl karındaşı Şerif Halil erbâb-ı istihkākdan idiği Der-aliyye’de müsâfireten sâkinler bî-garaz erbâb-ı vukūfdan Mehmed Esad Efendi b. Numan ve Osman b. Mehmed nâm mevsûku’l-kelim kimesnelerin alâ-tarîkı’ş-şehâde ihbârlarıyla mütehakkık ve zâhir olmağın bu sûretle cihet-i kitâbetin rub‘ hissesi müteveffâ-yı mezbûrun bilâ-veled mahlûlünden mezbûr Şerif Halil dâ‘îlerine tevcîh ve yedine berat-ı âlîşân ihsân buyurulmak husûsu re’y-i sâmîlerine menût idiği huzûr-ı âlîlerine i‘lâm olundu. Fî 28 Z sene [12]48