Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 91 Hüküm no: 61 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sivas’taki Şifaiye Medresesi Vakfı tevliyetinin Seyyid Mehmed Halîfe’ye tevcihi Sâdır olan fermân-ı âlîlerine imtisâlen medîne-i Sivas Nâibi Müftizâde es-Seyyid Ahmed Efendi dâ‘îlerinin işbu sene-i mübâreke Recebi’l-müreccebi’nin yirmi yedinci günü târihiyle müverrah mührü mutâbık bir kıt‘a arzıyla derkenârlara merbût olan arzuhâl zahrında sadr-ı Anadolu-yı sâbık fazîletlü inâyetlü Yahyazâde Mehmed Said Efendi hazretlerinin şehr-i sâbık Zilka‘detü’ş-şerîfesi’nin yirmi dokuzuncu günü târihiyle müverrah i‘lâmına nazar olundukda medîne-i mezbûrede vâki‘ Şifâiye Medresesi Vakfı’nın iki ve bir rub‘ hisse-i tevliyet cihetine bâ-berât-ı âlîşân mutasarrıf olan es-Seyyid Mustafa Halîfe bilâ-veled fevt olup hisse-i tevliyet-i mezkûr mahlûl olmağla sulbî oğlunun oğlu erbâb-ı istihkākdan es-Seyyid Mehmed Halîfe b. es-Seyyid Abdurrahman’a tevcîh olunması meâl-i arz-ı mezkûrdan müstebân ve hisse-i tevliyet-i mezkûre müteveffâ-yı mezbûrun mahlûlünden ecânibden diğer es-Seyyid Mehmed b. Abdullah’a bâ-arzuhâl tevcîhi husûsu irâde-i seniyyeye menût idiği zahr-ı arzuhâlde muharrer i‘lâm-ı mezkûrdan nümâyân ise de hisse-i tevliyet-i mezkûre henüz kimesneye tevcîh olmayıp bilâ-şurût müteveffâ-yı mezbûr es-Seyyid Mustafa Halîfe üzerinde olduğu derkenârlardan âşikâr ve tarafeyn Der-aliyye’de mevcûd bulunduğundan huzûr-ı şer‘a celb ve tevcîh-i pâdişâhî bulunmadığından hisse-i tevliyet-i mezkûreye şer‘an dahl ü ta‘arruz îcâb etmediği mezbûr diğer es-Seyyid Mehmed’e tefhîm ve hisse-i tevliyet-i mezkûreye müteveffâ-yı mezbûr es-Seyyid Mustafa Halîfe’nin sulbî oğlunun oğlu merkūm es-Seyyid Mehmed Halîfe ecânibden elyak ve müstahık olduğunu medîne-i mezbûre ahâlîsinden ve bî-garaz erbâb-ı vukūfdan Mehmed Emin b. Mehmed Ali b. el-Hâc Abdullah nâm kimesneler dahi haber vermeleriyle bu sûretde hisse-i tevliyet-i mezkûre ber-mûceb-i arz müteveffâ-yı mezbûr es-Seyyid Mustafa Halîfe’nin mahlûlünden sulbî oğlunun oğlu merkūm es-Seyyid Mehmed Halîfe’ye tevcîh ve yedine berat-ı şerîf-i âlîşân sadaka ve ihsân buyurulmak husûsu re’y-i âlîlerine menût idiği. Fî 25 Zilhicceti’ş-şerîfe sene 1248