Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 545 Hüküm no: 750 Orijinal metin no: [97a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kahveci Hacı Mustafa b. Abdullah’ın, Hacı Lütfullah Efendi b. Ahmed Efendi’ye olan borcunu ödemesine yapılan tenbih Ma‘rûz Derûn-ı arzuhâlde mezkûrü’l-ism el-Hâc Lütfullah Efendi b. Ahmed Efendi nâm kimesne meclis-i şer‘de sahib-i arzuhâl Kahveci el-Hâc Mustafa b. Abdullah nâm kimesne muvâcehesinde mezbûr el-Hâc Mustafa’ya târih-i i‘lâmdan bir buçuk sene mukaddem bi-tarîkı’l-mudârebe iki yüz guruş vermişidim meblağ-ı mezkûrun yüz on guruşunu bundan akdem ahz edip hâlâ doksan guruşu zimmetinde kalmağla taleb ederim deyü ba‘de’d-da‘vâ ve’s-suâl mezbûr el-Hâc Mustafa cevâbında fi’l-hakīka müdde‘î-i mezbûrdan bi-tarîkı’l-mudârebe iki yüz guruş ahzını ikrâr lâkin meblağ-ı mezbûrdan müşterâ on üç guruş kıymetli bir çift incili kuşak bilâ-ta‘ad velâ taksîr zâyi‘ olup ve sâir eşyâdan dahi hîn-i i‘mâlimde asıl mâla otuz guruş zarar terettüb etmekle ancak zimmetimde kırk yedi guruş bâkī kalmışdır deyü ol mikdârında ba‘de’d-def‘ ve’l-inkâr mezbûr el-Hâc Mustafa ümenâdan olup yemîniyle tasdîk olunur makūlesinden olmağla bi’t-taleb ba‘de’t-tahlîfi’ş-şer‘î mûcebiyle meblağ-ı bâkī-i mezkûr kırk yedi guruşu müdde‘î-i mezbûr Lütfullah Efendi’ye edâ ve teslîme mezbûr el-Hâc Mustafa’ya tenbîh olunduğu Mahkeme-i Bâb’da ba‘de’t-tescîl mübâşirleri Mumcu Halil Beşe ile huzûr-ı âlîlerine i‘lâm olundu bâkī emr [ü] fermân men-lehu’l-emr hazretlerinindir. Fî 29 Cumâdelûlâ sene 1163