Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 546 Hüküm no: 751 Orijinal metin no: [97b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melek bt. Ağya’nın, hizmetini gördüğü Abraham v. Artin’deki alacak davasında sulh olduğu Ma‘rûz Sahibe-i arzuhâl Melek bt. Ağya nâm Nasrâniye şahsı Artin v. Ohannes ve Mekyal v. Artin nâm zimmîler ta‘rîfleriyle mu‘arrefe oldukdan sonra meclis-i şer‘de derûn-ı arzuhâlde mersûmü’l-ism Abraham v. Artin nâm zimmî muvâcehesinde ben bundan akdem ücret kavlinsizin mesfûr Abraham zimmîye dokuz sene hizmet etmemle sinîn-i mezkûrede eylediğim hizmetimin ecr-i mislini taleb ve da‘vâ eylediğimde mesfûr Abraham dahi hizmetinin ücreti mukābelesinde an-nakd sana yetmiş iki guruş ile beynimizde ma‘lûmü’l-cins ve’l-kıyem bir kat libâs verip âmme-i da‘vâdan zimmetimi ibrâ ve ıskāt etmişidin deyü def‘a tesâddî etmekle beynimizde münâza‘ât-ı kesîre vâki‘ olmuşidi el-hâletü hâzihî bâ-vesâtet-i muslihîn da‘vâ-yı mezkûremden merkūm Abraham ile yirmi guruş bedel-i makbûza sulh olup fîmâ-ba‘d müddet-i mezkûrede olan hizmetimin ecr-i misline müte‘allika âmme-i da‘vâdan mesfûr Abraham zimmî ile gāibûn ani’l-meclis zevcesi Sima bt. Agop ve karındaşı Agop ve vâlidesi Saltana’nın zimmetlerini ibrâ-i âm ile ibrâ ve ıskāt eylediğimde ol dahi ibrâ-i mezkûru ba‘de’l-kabûl bana medfû‘u olan meblağ-ı mezkûra müte‘allika âmme-i da‘vâdan benim zimmetimi ibrâ ve ıskāt eyledi deyü olan ikrârını merkūm Abraham dahi tasdîk eylediği Mahkeme-i Bâb’da ba‘de’t-tescîl mübâşirleri Mehmed Çavuş kulları ile huzûr-ı âlîlerine i‘lâm olundu. Fî 29 Ca sene 1163