Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 551 Hüküm no: 759 Orijinal metin no: [99a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Agop v. Avanis’in Mehmed Efendi b. Abdullah aracılığıyla mamiran çiçeği diye aldığı çiçeğin nar kabuğu çıktığının anlaşılması üzerine Mehmed Efendi’ye ödediği paranın geri verilmesi talebiyle açtığı davada sulh oldukları Ma‘rûz Kuyumcu tâifesinden olup arzuhâl eden Agop v. Avanis nâm zimmî bi’t-terâzî meclis-i şer‘-i enverde derûn-ı arzuhâlde mezkûrü’l-ism Mehmed Efendi b. Abdullah muvâcehesinde târih-i i‘lâmdan iki sene mukaddem mezbûr Mehmed Efendi mahrûse-i Galata’da mütemekkin Frenk tüccârından gāib ani’l-meclis Nikolta nâm müste’menden beş yüz yirmi iki guruş semen-i medfû‘a mamiran çiçeği deyü alıverdiği seksen miskāl eczâsı mamiran çiçeği olmayıp nar kabuğu olmağla semeni olmak üzere kendiye medfû‘um olan beş yüz yirmi iki guruşu mezbûr Mehmed Efendi’den taleb ve istirdâd ederim deyü da‘vâ sadedinde olduğumda ol dahi husûs-ı mezkûru inkâr etmekle beynimizde ba‘de vukū‘ı’l-münâza‘a bâ-tavassut-ı muslihîn mezbûr Mehmed Efendi ile an-inkâr da‘vâ-yı mezbûremden iki yüz elli guruş bedel mukābelesinde sulh olup mâ‘adâ iki yüz yetmiş iki guruşa müte‘allika âmme-i da‘vâdan mezbûr Mehmed Efendi’nin zimmetini ba‘de’l-ibrâ ve’l-kabûl bedel-i sulh olan meblağ-ı merkūm iki yüz elli guruşu mezbûr Mehmed Efendi târih-i i‘lâmdan doksan bir gün tamamında bana edâ etmek üzere bi’t-taleb tecîl eylediğimde mezbûr Mehmed Efendi dahi kabûl edip meblağ-ı merkūmu müddet-i mezkûre tamamında müeccelen edâya ta‘ahhüd ve iltizâm eyledi deyü olan ikrârını mezbûr Mehmed Efendi dahi tasdîk eylediği Mahkeme-i Bâb’dan huzûr-ı âlîlerine i‘lâm olundu. Fî 7 C sene 1163