Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 551 Hüküm no: 758 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balıkesirli Mustafa b. İsmail, Mustafa, Köprülü Osman, Molla Ali ve Mehmed ve İstanbullu hmed b. Süleyman, Filibeli İlya v. Marko ve ortağı Yorgi v. Dimitri adlı tüccarların abacı esnafında olan alacaklarının tahsilini bir sene tecil ettikleri Ma‘rûz Tüccâr tâifesinden Balıkesirli Mustafa b. İsmail diğer Mustafa’nın vekîli Ömer b. el-Hâc Yakub ve Köprü kasabası tüccârından Osman ve Molla Ali ve Mehmed ve İstanbûlî el-Hâc Ahmed b. Süleyman ve Filibeli İlya v. Marko ve şerîki Yorgi v. Dimitri meclis-i şer‘de abacı esnâfının kethudâları Veliyüddin Çelebi ve Yiğitbaşı Mehmed ve ricâlinden el-Hâc Yusuf ve Yakub Çelebi ve es-Seyyid el-Hâc Mustafa ve Ahmed Çelebi ve el-Hâc Ahmed ve diğer Ahmed Ağa ve Ömer Beşe ve İsmail ve diğer Ahmed ve diğer Mustafa ve Veliyüddin ve sâir mazbûtü’l-esâmî kimesneler muvâcehelerinde bundan akdem malımızdan esnâf-ı mezkûre ricâlinin semen-i ma‘lûma iştirâ ve kethudâları mezbûr ma‘rifetiyle herbirine tevzî‘an teslîm ve onlar dahi kabz ve tesellüm eyledikleri ma‘lûmü’l-aded ve’l-evsâf aba ve astar semenlerinden bin beş yüz seksen beş guruş hakkımız olmağla meblağ-ı mezkûru taleb ederiz deyü da‘vâ eylediğimizde onlar dahi ber-minvâl-i muharrer ikrâr lâkin bi-kazâillâhi te‘âlâ bu esnâlarda vâki‘ olan harîkde dükkânları eşyâlarıyla ma‘an bi’l-külliye muhterik olmağla tecîl[e] tâlibler olmalarıyla biz dahi bi’t-terâzî târih-i i‘lâmdan bir sene tamamına değin medyûnlarımız olan mezbûrûnu tecîl eylediğimizde onlar dahi kabûl ve ber-vech-i muharrer ecel-i mezkûr tamamında meblağ-ı mezkûru bize tamamen ta‘ahhüd ve iltizâm eylediler dediklerini mezbûrûn tasdîk ve râzılar olup bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî-gurreti C sene 1163