Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 557 Hüküm no: 768 Orijinal metin no: [100a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in cariyesi Ayşe’nin daha önce hürriyet iddiasıyla açtığı davanın aslı olmadığını itirafı üzerine Hatice Hanım’a cariye olarak itaat etmesine tenbih olunduğu Ma‘rûz Sâbıkā rıkka inkıyâdını mu‘arrefe [mu‘terife] olmağla ber-vech-i âtî da‘vâya kıbel-i şer‘den me’zûne olan orta boylu çatık kaşlı elâ gözlü Âişe meclis-i şer‘de kendiye vâzı‘atü’l-yed olup İstanbul’da Mahmud Paşa mahallesinde sâkine ve zâtı ta‘rîf-i şer‘î ile mu‘arrefe olan sahibe-i arzuhâl Hadîce bt. Mehmed nâm hatun mahzarında ben vilâyet-i Anadolu’da Hasankalesi karyelerinden Yıkılgan nâm karyede sâkin hürrü’l-asl es-Seyyid Mustafa b. es-Seyyid Mehmed’in firâşından hâsıla ve hürretü’l-asl zevce-i menkûhası Hüsnişah bt. Yusuf nâm hatundan mütevellide hürreyim deyü [100b] bundan akdem bazı kimesnelerin tahrîk ve iğvâsıyla ber-vech-i muharrer da‘vâ-yı hürriyete tesâddî edip lâkin ben fi’l-asl diyâr-ı Gürcistan’da Acara sancağında Lehon? nâm karyede sâkin Tomaza’nın firâşından hâsıla ve zevcesi Marya nâm Nasrâniyeden mütevellide Gürciyyetü’l-asl rakīkayım deyü ikrâr ve i‘tirâf etmeğin mûcebiyle mâlikesi mezbûr[e] Hadîce Hatun’a rakīka-i inkıyâdına mevsûfe-i mezbûre Âişe’ye tenbîh olunduğu bi’t-terâzî Mahkeme-i Bâb’dan ba‘de’t-tescîl mübâşirleri Hâfız Osman kulları ile huzûr-ı âlîlerine i‘lâm olundu. Fî 14 min-Cumâdelâhire sene 1163