Bab Mahkemesi 197 Numaralı Sicil (H. 1162-1163 / M. 1749-1750) cilt: 73, sayfa: 556 Hüküm no: 767 Orijinal metin no: [100a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakub Ağa’nın Cevvizâde Vakfı’ndan tasarrufunda olup yanan hanın tamire muhtaç olan mahallerinin tamirine başlandığı ve tamiratın nizam ve usullere uygun şekilde devam ettiği Bâ-mühr-i hazret-i efendi Ma‘rûz Fermân-ı âlîlerine imtisâlen cânib-i şer‘den irsâl olunan keşif nâibimiz İbrahim Efendi dâ‘îleri hâssa mi‘mâr ağa kulları bi’n-nefs hulefâsından es-Seyyid Mehmed ve Hüseyin ve sâir cerîdede mazbûtü’l-esâmî Müslimîn ile arzuhâlde mezkûr Mercan Câmi‘-i şerîfi kurbünde vâki‘ sahib-i arzuhâl Yakub Ağa’nın Cevvîzâde Vakfı’ndan bi’l-icâreteyn mutasarrıf olduğu on altı bâb tahtânî odası olan kârgir hana varıp vakf-ı mezkûrun kâtibi ve mütevellîsi tarafından vekîli olan İmâm Hüseyin Efendi hazır olduğu hâlde keşif ve rü’yet eylediklerinde hîn-i harîkde han-ı mezkûrun üzerinde pûşîde kiremidleri çiğnenip ve odalarının pencere kapakları ve kapıları ve derûnunda olan kadîmî tahta kerevetleri muhterik olup sıvaları ve dehliz ta‘bîr olunur talaş ve arzen iki zirâ‘ münhedim olan kemer bu zikrolunan mahallerin kadîmîsi üzere ta‘mîr şürût-ı hatt-ı hümâyûn-ı şevket-makrûna mugāyir olmadığını ve ba‘de’t-termîm yine keşif ve mu‘âyene iktizâ eylediğini ve bu def‘a ta‘mîr ve binâsına müsâ‘ade buyrulan dokuz bâb handan hâric olduğunu mi‘mâr ağa ve halîfeleri mezbûrân kullarının haberlerini mezbûr dâ‘îleri mahâllinde ketb ü tahrîr ve ba‘dehû ümenâ-i şer‘le meclis-i şer‘a inhâ ve takrîr eylediği huzûr-ı âlîlerine i‘lâm olundu bâkī emr [ü] fermân hazret-i veliyyü’l-emrindir. Fî 12 Cumâdelâhire sene 1163