Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 94 Hüküm no: 66 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Amasya’nın Zinnunâbad kazasındaki Hamdullah Çelebi Vakfı tevliyetinin sülüs hissesinin Ahmed’e tevcihi Ma‘rûz-ı dâ‘î-i Devlet-i aliyyeleridir ki, Sâdır olan fermân-ı âlîlerine imtisâlen medîne-i Merzifon nâibi es-Seyyid Derviş Mustafa Efendi dâ‘îlerinin mührü mutâbık işbu arzıyla rûznâmçe-i askerî kaleminden mahrec derkenâra nazar olundukda Anadolu’da Sivas eyâleti dâhilinde Amasya sancağında Zinnunâbad kazâsında vâki‘ Hamdullah Çelebi Vakfı’nın vazîfesi mukayyed olmayıp şurûtu nâ-ma‘lûm olarak humus mahsûlüyle tevliyeti bâ-berât-ı âlîşân Mustafa ve Mehmed ve Ahmed ebnâ-i İbrahim b. Mustafa nâm üç nefer karındaşların iştirâken üzerlerinde olduğu derkenârdan müstebân ve merkūm Mustafa mezkûr olmayarak ancak tevliyet-i mezkûre merkūmân Mehmed ve Ahmed’in bi’l-iştirâk tasarruflarında iken mezbûr Mehmed bilâ-veled fevt olup münhal olan hissesi müştereki karındaşı mezbûr Ahmed kendüye tevcîh olunmasını istid‘âsında olduğu meâl-i arz-ı mezkûdan nümâyân ise de merkūm Mehmed’in bilâ-veled fevti vâki‘ ve karındaşı mezbûr Ahmed umûr-ı vakfa a‘lem ve tevliyet-i mezkûreyi kemâ hüve hakkuhû idâre ve rü’yete muktedir olduğunu kazâ-i mezbûr ahâlîsinden Der-aliyye’de müsâfiren sâkinler Hacı Osmanzâde el-Hâc Ali ve Osmanzâde Mehmed nâm kimesneler dahi haber vermeleriyle bu sûretde münhal olan sülüs hisse tevliyet sülüs an-humus hisse mahsûlüyle karındaşı müştereki merkūm Ahmed dâ‘îlerine tevcîh ve yedine berat-ı şerîf-i âlîşân inâyet ve ihsân buyurulmak iktizâ eylediği huzûr-ı âlîlerine i‘lâm olundu. El-emr li-veliyyü’l-emr. Fî 5 M sene [12]49