Anadolu Sadareti Mahkemesi 1 Numaralı Sicil (H. 1247-1250/ M. 1831-1834) cilt: 93, sayfa: 95 Hüküm no: 67 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Akşehir’in Hacı Kuşçu mahallesindeki mescidin imametinin Halil’e tevcihi Ma‘rûz, Sâdır olan fermân-ı âlîlerine imtisâlen işbu arzuhâl ve derkenâra nazar olundukda vilâyet-i Anadolu’da Akşehir kazâsında Hacı Kuşçu mahallesinde vâki‘ mescid-i şerîfde ber-vech-i hasbî imâmet cihetine mutasarrıf olan Ali b. Veliyüddin bilâ-veled fevt olup yeri hâlî ve hizmet-i lâzımesi mu‘attal kaldığından bahisle cihet-i mezbûre müteveffâ-yı mezbûrun mahlûlünden kendüye tevcîh ve yedine berat-ı şerîf-i âlîşân i‘tâsı sahib-i arzuhâl müteveffâ-yı mezbûrun karındaşı Halil b. Veliyüddin dâ‘îleri istid‘â-yı inâyet eder fi’l-hakīka imâmet-i mezkûre müteveffâ-yı mezbûr Ali’nin üzerinde olduğu derkenârda müstebân ve merkūm Ali’nin bilâ-veled fevti vâki‘ ve sahib-i arzuhâl karındaşı Halil her vechile ehil ve muhtâr-ı cemâ‘at olup ve diğer arzuhâlde istid‘â edenden dahi elyak ve müstehık olduğunu Dersa‘âdet’de müsâfireten sâkinler talebe-i ulûmdan es-Seyyid Hamid Efendi b. Veli ve Mehmed b. Ahmed nâm kimesnelerin alâ-tarîkı’ş-şehâde ihbârlarından mâ‘adâ istihkākı lede’l-imtihân zâhir ve nümâyân olmağın bu sûretde cihet-i mezkûre müteveffâ-yı merkūm Ali’nin bilâ-veled mahlûlünden erbâb-ı istihkākdan karındaşı sahib-i arzuhâl Halil dâ‘îlerine tevcîhi emr-i savâb idiği huzûr-ı âlîlerine i‘lâm olundu. Fî 17 M sene [12]49