Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 77 Hüküm no: 42 Orijinal metin no: [5b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yorgi’nin Tüccar Boronço’ya olan borcunu ödemesi Lahm semeninden 415 guruşa hüküm Ma‘rûz Tüccârdan Boranço v. Yorgi İstanbul Bâb Mahkemesi’nde meclis-i şer‘-i hatîrde bakkāl tâifesinden Nevşehirli Yorgi v. Eftim nâm zimmî muvâcehesinde benim mersûm Yorgi zimmî zimmetinde târîh-i i‘lâmdan bir buçuk ay mukaddem beher vakıyyesi yüz onar paraya olarak mâlımdan ve yedimden iştirâ ve kabz eylediği beş yüz kırk sekiz vakıyye kaşar peyniri semeninden bin beş yüz sekiz guruş on beş para alacak hakkımın beş yüz dört guruşunu mesfûr Yorgi zimmî mukaddemâ ceste ceste bana edâ ve teslîm ben dahi yedinden ahz u kabz etmemle bâkīsi olan bin dört yüz guruş on beş parayı mersûm Yorgi zimmîden hâlâ taleb ederim deyü da‘vâ ettikde ol dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin alâ-mûcibi i‘tirâfihi meblağ-ı bâkī-i mezkûr bin dört yüz guruş on beş paranın müdde‘î-i mesfûr Boranço’ya edâ ve teslîmiyle mersûm Yorgi zimmî ilzâm olunduğu mübâşirleri Bâb-ı Seraskerî kavaslarından Cibâlili Hasan Kavas kulları yediyle huzûr[-ı âlîlerine i‘lâm olundu] Fî 15 Receb sene [12]55