Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 78 Hüküm no: 46 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manolaki’nin kefaletinden doğan borcunu ödemesi Sulh, bedel-i sulhu edâya tenbîh Ma‘rûz Kasab tâifesinden Aleko v. [To]dori nâm zimmî İstanbul Bâb Mahkemesi’nde meclis-i şer‘de Manolaki v. Yanako nâm zimmî muvâcehesinde mersûmun li-ebeveyn er karındaşı gāib ani’l-beled Azazil zimmî zimmetinde lahm-ı ganem semeninden iki yüz guruş alacak hakkıma işbu mersûm Manolaki zimmî tarafeynden bi’l-emr ve’l-kabûl kefâlet-i sahîha ile kefîl ve dâmin olmağla meblağ-ı mezkûru zimmî-i mersûmdan kefâlet-i mahkiyesine binâen hâlâ taleb ederim deyü tasaddî eylediğim da‘vâmdan bâ-tavassut-ı muslihîn mersûm Manolaki zimmî ile bi’t-tav‘ ve’r-rızâ yüz guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve’t-tasdîk ibrâdan müstesnâ bedel-i sulh-ı mezkûr yüz guruşu müdde‘î-i mersûm Aleko zimmîye edâ ve teslîme mersûm Manolaki zimmîye tenbîh olunduğu mübâşirleri Bâb-ı Seraskerî kavaslarından Emin Kavas kulları yediyle huzûr[-ı âlîlerine i‘lâm olundu] Fî 17 Receb sene [12]55