Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 81 Hüküm no: 50 Orijinal metin no: [6a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesibe Hatun’un borcunu ödemesi 500 guruşa hüküm Ma‘rûz Sâhib-i arzuhâl Abdullah Ağa b. Hasan nâm kimesne İstanbul Bâb Mahkemesi’nde meclis-i şer‘-i münîrde mukaddemâ kâyınvâlidesi derûn-ı arzuhâlde mezkûretü’l-ism mu‘arrefetü’z-zât Nesibe bt. Ali nâm hatun muvâcehesinde mezbûre Nesibe Hatun zimmetinde işbu yedimde olup bin iki yüz kırk üç senesi Şa‘bânü’l-mu‘azzamı’nın dokuzuncu günü târîhiyle müverrah bir kıt‘a temessük mantûkunca mâlımdan ve yedimden iktirâz ve kabz ve umûruna sarfla istihlâk eylediği beş yüz guruş alacak hakkım olmağla meblağ-ı mezkûru mezbûre Nesibe Hatun’dan hâlâ taleb ederim deyü ba‘de’d-da‘vâ ve’l-inkâr müdde‘î-i merkūm Abdullah Ağa ber-vech-i muharrer müdde‘âsını her biri lede’t-tezkiye adl ve makbûlü’ş-şehâde idikleri ihbâr olunan Bezzâzistânî el-Hâc Yunus Efendi b. Mustafa ve el-Hâc Ali Ağa b. Abdullah nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı mezkûr beş yüz guruşu müdde‘î-i merkūm Abdullah Ağa’ya edâ ve teslîme merkūme Nesibe Hatun’a tenbîh olunduğu huzûr[-ı âlîlerine i‘lâm olundu] Fî 8 Receb sene [12]55