Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 80 Hüküm no: 49 Orijinal metin no: [6a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros’un borcunu ödemesi Deyni edâ, fekk-i rehin [Ma‘rûz] Hamamcı tâifesinden Serkiz v. Agop nâm zimmî İstanbul Bâb Mahkemesi’nde meclis-i şer‘-i münîrde yine tâife-i mersûmeden Bedros v. Sekyas nâm zimmî muvâcehesinde mersûm Bedros zimmî bundan akdem mâlımdan ve yedimden iktirâz ve kabz ve istihlâk eylediği iki yüz kırk guruş deyni mukābelesinde mâlından bir sîm kutu ve bir hilâlî koyun sâ‘atini yedime <> rehin vaz‘ ü teslîm etmişidi el-hâletü hâzihî deyni olan meblağ-ı mezkûru bana edâ birle sâlifü’l-beyân kutu ve sâ‘ati rehniyetden fekk ü tahlîse mersûm Bedros zimmîye tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince meblağ-ı mezkûr iki yüz kırk guruşu mersûm Sergiz zimmîye edâ birle mârrü’l-beyân kutu ve sâ‘ati rehniyetden fekk [ü] tahlîse mersûm Bedros zimmîye tenbîh olunduğu mübâşirleri Bâb-ı Seraskerî kavaslarından Yaylalı Mehmed Kavas kulları yediyle huzûr[-ı âlîlerine i‘lâm olundu] Fî 17 Receb sene [12]55