Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 82 Hüküm no: 52 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. İstefan’ın borcunu ödemesi 1700 guruş hüküm Ma‘rûz Sebzeci tâifesinden arzuhâl eden Vasil v. Mitro nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde ismi mastûr Anaştaş v. İstefan nâm zimmî muvâcehesinde târîh-i i‘lâmdan iki buçuk sene mukaddem mer[sum] Anaştaş zimmînin gāib ani’l-meclis li-ebeveyn er karındaşı oğlu Angeli zimmîye dükkân icâresinden zimmetinde deyni olup bi-şartı’r-rücû‘ emriyle gāib-i mersûma mâlımdan medfû‘um olan iki bin beş yüz guruşun hesâbını işbu târîhden dört ay mukaddem İstanbul’da Sultanbayezid avlusunda Kuşcu Sotiri zimmînin dükkânında rü’yet eylediğimizde benim mersûmun zimmetinde bin sekiz yüz kırk guruş hakkım zuhûr ve meblağ-ı mezkûrun yüz kırk guruşunu rızâmla hatt ü tenzîl eylediğimden sonra bâkīsi olan bin yedi yüz guruş zimmetinde mersûm Anaştaş zimmî bana deyni olduğunu ikrâr ü i‘tirâf etmekle meblağ-ı mezkûr bin yedi yüz guruşu mersûm Anaştaş zimmîden hâlâ taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını her biri mahallerinde lede’t-tezkiye makbûlü’ş-şehâde idikleri ihbâr olunan Yani v. Kostandi ve Sotiri v. Kostandi nâm zimmîler şehâdetleriyle bi’l-muvâcehe vech-i şer‘î üzere isbât etmeğin mûcebince meblağ-ı mezkûr bin yedi yüz guruşu müdde‘î-i mersûm Vasil zimmîye mersûm Anaştaş zimmîye tenbîh olunduğu huzûr[-ı âlîlerine i‘lâm olundu] Fî 14 Receb sene [12]55