Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 92 Hüküm no: 74 Orijinal metin no: [8b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş’ın borcunu ödediği 2000 guruş deyni edâ, rehni fekk Ma‘rûz Arzuhâl eden Artin v. Bağdisar zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde ismi mastûr Anaştaş v. Pandeli nâm zimmî muvâcehesinde mesfûr Anaştaş zimmî bundan akdem mâlımdan ve yedimden bâ-temessük iktirâz ve kabz ve umûruna sarfla istihlâk eylediği iki bin guruş deyni mukābelesinde mâlından tek taşlı bir elmas yüzüğü yedime rehin vaz‘ u teslîm ben dahi irtihân ve kabz etmişidim el-hâletü hâzihî meblağ-ı mezkûr iki bin guruşu bana edâ birle rehn-i mezkûru rehniyetden fekk ü tahlîse mersûm Anaştaş zimmîye tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince meblağ-ı mezkûr iki bin guruşu müdde‘î-i mersûm Artin zimmîye edâ birle rehniyetten fekk ü tahlîse mesfûr Anaştaş zimmîye tenbîh olunduğu huzûr[-ı âlîlerine i‘lâm olundu] Fî 25 Receb sene [12]55