Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 93 Hüküm no: 75 Orijinal metin no: [8b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bağdisar’ın borcunu ödemesi Bilâ-beyyine mu‘ârazadan men‘ 100 [190] guruşa ilzâm Ma‘rûz Hâmilü’l-i‘lâm Donik v. Bedros nâm zimmî İstanbul Bâb Mahkemesi’nde meclis-i şer‘de Bağdisar v. Ohannes nâm zimmî muvâcehesinde benim mesfûr Bağdisar zimmîye zimmetimde cihet-i karzdan yüz guruş ve cihet-i kefâlet-i sahîhadan iki yüz guruş ki cem‘an üç yüz guruş deynim olup ben deynim olan meblağ-ı mecmû‘-ı mezkûru bundan akdem zimmî-i mersûma bâ-i‘lâm edâ ve teslîm edip ancak meblağ-ı mezkûr içün bir sene müddetde bilâ-devr-i nemâ olarak mâlımdan ceste ceste mesfûr Bağdisar zimmîye yüz doksan guruş medfû‘âtım olmağla meblağ-ı mezkûr yüz doksan guruşu mesfûr Bağdisar zimmîden istirdâd ederim deyü da‘vâ ettikde ol dahi mârru’z-zikr yüz doksan guruşu mersûm Donik zimmî bundan akdem mâlımdan meblağ-ı mecmû‘-ı mezkûrdan mâ‘adâ istidâne ve ba‘dehu edâ eylediği mebâliğ-i ma‘lûmenin bâ-devr-i şer‘î ribhi mülzemi içün kabz etmişidim deyü inkâra mukārin eylediği müdde‘âsını isbâtdan izhâr-ı acz edip bi’t-taleb mersûm Donik zimmîye bi’l-muvâcehe ber-nehc-i şer‘î üzere yemîn verilmeğin mûcebince müdde‘î-i mersûm Donik zimmî da‘vâ-yı mezkûresiyle mersûm Bağdisar zimmîye bilâ-beyyine mu‘ârazadan ba‘de’l-men‘ mersûm Bağdisar zimmînin sâlifü’l-beyân ikrâr ve i‘tirâfıyla lâzım gelen meblağ-ı mezkûr yüz doksan guruşu müdde‘î-i mersûm Donik zimmîye edâ ve teslîme mersûm Bağdisar zimmîye tenbîh olunduğu tescîl ve bi’l-iltimâs huzûr[-ı âlîlerine i‘lâm olundu] Fî 7 Receb sene [12]55