Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 97 Hüküm no: 82 Orijinal metin no: [9b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım’ın boşandığı kocasıyla mehir ve alacak davalarında sulh olduğu Tatlîk mehrini deynine takās ve mahsûb i‘lâmı 450 guruş Ma‘rûz İstanbul’da Taşkasab kurbünde Sarımusa mahallesinde sâkine mu‘arrefetü’z-zât Rifat nâm-ı diğer Fâtıma bt. Abdullah nâm hatun İstanbul Bâb Mahkemesi’nde meclis-i şer‘de zevc-i mutallıkı perdahcı esnâfından İbrahim Ağa b. Ahmed nâm kimesne muvâcehesinde mezbûr İbrahim Ağa yüz guruş mehr-i müeccel tesmiyesiyle zevc-i dâhilim iken işbu târîh-i i‘lâmdan dokuz gün mukaddem beni bâyinen tatlîk etmekle zimmetinde mütekarrir ve ma‘kūdün-aleyh olan yüz guruş mehr-i müeccelim ile nafaka-i iddet-i mu‘ayyene-i ma‘lûmem ve me’ûnet-i süknâm mukābelelerinde bi’t-terâzî beynimizde ta‘yîn olunan yüz elli guruş ki cem‘an iki yüz elli guruş benim mezbûr İbrahim Ağa’ya zimmetimde cihet-i deyn-i şer‘den bâ-i‘lâm-ı şer‘î mahkûmün-bih deynim olan iki yüz elli guruşa bi’t-terâzî takās ve mahsûb ve ol vechile her birimiz istîfâ-yı hak edip bi’l-cümle husûs-ı mezkûra [ve] hukūk-ı zevciyyete ve ibtidâ-i zevciyyetden işbu târîh-i i‘lâma gelince sâir cemî‘ hukūk-ı şer‘iyeye müte‘allika âmme-i da‘vâdan ben merkūm İbrahim Ağa’nın zimmetini ol dahi benden iki kıt‘a temessük mantûkunca cihet-i karzdan mütâlebe eylediği dört yüz elli guruşa ve hukūk-ı zevciyyete ve ibtidâ-i zevciyyetimizden târîh-i i‘lâm-ı mezkûra gelince sâir cemî‘ hukūk-ı şer‘iyeye müte‘allika âmme-i da‘vâdan benim zimmetimi her birimiz ibrâ-i âmm-ı sahîh-i şer‘î ile ibrâ ve iskāt ve tarafeynden her birimiz ber-minvâl-i muharrer âharın ibrâsını kabûl eyledik deyü ikrâr ve tasdîkleri huzûr[-ı âlîlerine i‘lâm olundu] Fî 29 Receb sene 1255