Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 96 Hüküm no: 81 Orijinal metin no: [9a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Halil’in boşadığı hanımına olan borcunu ödemesi 350 guruşa hüküm Ma‘rûz İstanbul’da Aksaray kurbünde Mercimek mahallesinde sâkine mu‘arrefetü’z-zât Esma bt. Mehmed Emin nâm hatun İstanbul Bâb Mahkemesi’nde meclis-i şer‘-i münîrde zevc-i sâbıkı es-Seyyid Halil b. Mustafa nâm kimesne muvâcehesinde mezbûr es-Seyyid Halil Ağa zimmetinde bundan akdem zevciyyet beynimizde kāime iken iktirâz ve kabz ve umûruna sarfla istihlâk eylediği üç yüz elli guruş alacak hakkım olmağla meblağ-ı mezkûru merkūm es-Seyyid Halil Ağa’dan hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim olan meblağ-ı mezkûr üç yüz elli guruşu zevcem mezbûreye mukaddemâ ceste ceste tamâmen edâ ve teslîm etmişidim deyü müdde‘iyye-i mezbûrenin inkârına mukārin eylediği def‘ini isbâtdan izhâr-ı acz edip tahlîfe dahi tâlib olmamağın mûcebince [9b] merkūm es-Seyyid Halil Ağa def‘-i mezkûruyla merkūm[e] Esma Hatun’a bilâ-beyyine mu‘ârazadan ba‘de’l-men‘ sâlifü’l-beyân ikrâr ve i‘tirâfı mûcebince lâzım gelen meblağ-ı mezkûr üç yüz elli guruşu müdde‘iyye-i mezbûre Esma Hatun’a edâ ve teslîme merkūm es-Seyyid Halil Ağa’ya tenbîh olunduğu huzûr[-ı âlîlerine i‘lâm olundu] Fî 19 Receb sene [12]55