Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 98 Hüküm no: 85 Orijinal metin no: [9b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kethüdakadın Camii İmâmı Hafız Mehmed’in yaralayıp sulh oldukları Şerife Fâtıma Hanım’a olan borcunu ödemesi 500 guruşa hüküm Ma‘rûz İstanbul’da Edirnekapısı kurbünde Haticesultan mahallesinde sâkine mu‘arrefetü’z-zât Şerife Fâtıma bt. Mehmed nâm hatun İstanbul Bâb Mahkemesi’nde meclis-i şer‘-i münîrde Kethüdâkadın Câmi‘-i şerîfi İmâmı Hafız Mehmed Efendi b. Ali nâm kimesne muvâcehesinde merkūm Hafız Mehmed Efendi târîh-i i‘lâmdan yirmi bir gün mukaddem beni Camî‘-i mezkûr pîş-gâhında bi-gayri hakkın sopa ile darb eylediğinden başka Çerkes bıçağıyla sol küreğimin üzerinden bir mahâlden darb ü cerh etmekle mûcib-i şer‘îsini taleb ederim deyü tasaddî eylediğim da‘vâmdan merkūm Hafız Mehmed Efendi ile târîh-i i‘lâmdan on bir gün mukaddem huzûr-ı şer‘de beş yüz guruş bedel-i makbûza sulh olup ol dahi sulh-ı mezkûru ba‘de’l-kabûl merkūm Hafız Mehmed Efendi’ye <> meclis-i şer‘de mâlımdan beş yüz guruş ikrâz ve teslîm eylediğimde ol dahi yedimden iktirâz ve kabz ve umûruna sarfla istihlâk etmekle meblağ-ı mezkûrdan ma‘adâ cerh-i mezkûra müte‘allika da‘vâdan ben merkūmun zimmetini kabûlü hâvî ibrâ ve iskāt etmişidim el-hâletü hâzihî meblağ-ı mezkûr beş yüz guruşu bana edâya merkūm Hafız Mehmed Efendi’ye tenbîh olunmak murâdımdır deyü da‘vâ ettikde ol dahi cevâbında kaziyye minvâl-i muharrer üzere olduğunu bi-tamâmihâ <> tâyi‘an ikrâr ü i‘tirâf etmeğin alâ-mûcibi i‘tirâfihi mezkûr beş yüz guruşun müdde‘iyye-i merkūme Şerife Fâtıma Hatun’a edâsıyla merkūm Hafız Mehmed Efendi ilzâm olunduğu mübâşirleri Bâb-ı Seraskerî kavaslarından Davudpaşalı Mehmed Kavas kulları yediyle huzûr[-ı âlîlerine i‘lâm olundu] Fî 16 Receb sene [12]55