Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 99 Hüküm no: 86 Orijinal metin no: [10a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Mihri Hanım’ın Kezban Hanım’dan alacaklı olduğu yolundaki iddiasını ispatlayamadığı Bî-vech-i şer‘î mu‘ârazadan men‘ Ma‘rûz İstanbul’da Samatya kurbünde Sancakdârhayreddin mahallesinde sâkine iken bundan akdem vefât eden Şerife Emine Hatun bt. es-Seyyid Hasan’ın li-ebeveyn er karındaşı kızı ve hasran vârisi olup sâhibe-i arzuhâl mu‘arrefetü’z-zât Şerife Mihri bt. es-Seyyid Mehmed b. mezbûr es-Seyyid Hasan nâm hatun İstanbul Bâb Mahkemesi’nde meclis-i şer‘-i münîrde derûn-ı arzuhâlde ismi mezkûre kezâlik zâtı mu‘arrefe Kezban bt. Mehmed nâm hatun muvâcehesinde mûrisem mezbûre Şerife Emine Hatun zikr olunan Sancakdârhayreddin mahallesinde vâki‘ merkūme Kezban Hatun’un menzilinde vefât etmekle ol vechile menzil-i mezkûrda mevcûd müteveffât-ı mezbûrenin bi’l-cümle terekesi olup hasran bana mevrûs olan mecmû‘u bin beş yüz guruş kıymetli bir minder ve iki çit mak‘ad ve otluk memlü beledî altı yastık ve bir köhne kilim ve bir çit döşek ve bir şilte ve bir çit çârşeb ve üç çit baş yastığı ve iki basma yüz yastığı biri çit ve biri basma iki yorgan ve bir çuka ferâce ma‘a yaşmak ve bir makrame ve dört sagīr tancere ve iki kapak ve bir câmeşûy tanceresi ve sekiz sahan ve iki kadâif tebsisi ve bir sini ve bir şorba tası ve iki hamam tası ve bir fener ve bir tâbe ve bir maşrapa ve bir kefgir ve bir câmeşûy leğeni ve bir mangal ve bir leğen ma‘a ıbrığı mezbûre Kezban Hatun fuzûlî zabt etmekle eşyâ-i muharrere-i mezkûre mevcûde ise a‘yânını müstehleke ise ba‘de’s-sübût kıymet-i mezkûrelerini mezbûre Kezban Hatun’dan tazmîn taleb ederim deyü da‘vâ ettikde ol dahi cevâbında yedimde olup işbu bin iki yüz elli beş senesi Cumâdelâhire’nin yirmi dokuzuncu günü târîhiyle müverraha ve hâlâ Davudpaşa Mahkemesi’nde hilâfeten müvellâ nâib-i şer‘-i şerîf olan müderrisîn-i kirâm-ı zevi’l-ihtirâmdan Süleyman Efendizâde fazîletlü Ahmed Reşid Efendi’nin imzâsıyla mümzât ve hatemi ile mahtûm bir kıt‘a hüccet-i şer‘iye nâtık olduğu üzere müteveffât-ı mezbûre Şerife Emine Hatun hayatında ve kemâl-i akl ve sıhhatinde eşyâ-i muharrere-i mezkûreyi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile üç yüz guruşa bana bey‘ ve temlîk ve teslîm eyledikde ben dahi iştirâ ve temellük ve tesellüm ve kabz u kabûl ve semen-i mezkûr üç yüz guruş mütâlebesine müte‘allika da‘vâdan benim zimmetimi kabûlümü hâvî ibrâ ve iskāt etmişidi[m] deyü müdde‘iyye-i mezbûrenin inkârına mukārin eylediği def‘ini ve mazmûn-ı hüccet-i şer‘iyeyi her biri lede’t-tezkiye adl ve makbûlü’ş-şehâde idikleri ihbâr olunan Kavukçu Molla Ali b. Mustafa ve Çulcu Mehmed b. Ali nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebince müdde‘iyye-i mezbûre Şerife Mihri Hatun ber-vech-i muharrer da‘vâ-yı mezkûresiyle merkūme Kezban Hatun’a bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 25 Receb sene [12]55