Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 104 Hüküm no: 96 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Sıddıka Hanım’ın borcunu ödemesi 200 guruşa sulh, bedel-i sulhu ilzâm Ma‘rûz İstanbul’da Eğrikapı kurbünde Atîkalipaşa mahallesinde sâkine mu‘arrefetü’z-zât Fâtımatüzzehrâ bt. Ebubekir nâm hatun İstanbul Bâb Mahkemesi’nde meclis-i şer‘-i münîrde İstanbul’da Yedikule kurbünde el-Hâc Hamza mahallesinde sâkine kezâlik zâtı mu‘arrefe Şerife Âişe Sıddıka bt. Yusuf nâm hatun muvâcehesinde mezbûre Şerife Âişe Sıddıka Hatun zimmetinde târîh-i i‘lâmdan dört sene mukaddem mâlımdan ve yedimden iştirâ ve kabz eylediği bir lâciverd çuka ferâce semeninden üç yüz elli guruş ve bir nîmten ve bir şalvar ve bir yorgan ve bir döşek ve bir şilte ve bir baş yastığı semenlerinden yüz elli guruş ki cem‘an beş yüz guruş alacak hakkım olmağla meblağ-ı mezkûru mezbûre Şerife Âişe Sıddıka Hatun’dan hâlâ taleb ederim [deyü] tasaddî eylediğim da‘vâmdan bâ-tavassut-ı muslihîn mezbûre Şerife Âişe Sıddıka Hatun ile bi’t-tav‘ ve’r-rızâ iki yüz guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan ma‘adâya ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr iki yüz guruşun müdde‘iyye-i mezbûre Fâtımatüzzehrâ Hatun’a edâsıyla mezbûre Şerife Âişe Hatun ilzâm olunduğu mübâşirleri Bâb-ı Seraskerî kavaslarından Kocamustafapaşalı Hüseyin Kavas kulları yediyle huzûr[-ı âlîlerine i‘lâm olundu] Fî 2 Şa‘bân sene [12]55