Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 131 Hüküm no: 140 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın vefat eden Emin Ağa’daki alacağının terekesinden tahsili 150 guruşa sulh Ma‘rûz es-Seyyid Mustafa Ağa b. Yusuf nâm kimesne İstanbul Bâb Mahkemesi’nde meclis-i şer‘de bundan akdem vefât eden Emin Ağa b. Mustafa b. Abdullah’ın verâseti zevce-i menkûha-i metrûkesi Selime bt. Hasan nâm hatun ile sulbî kebîr oğulları İbrahim ve Osman ve sulbiye-i kebîre kızı Fâtıma’ya münhasıra olduğu lede’ş-şer‘i’l-enver zâhir ve mütehakkık oldukdan sonra verese-i mezbûrûndan tereke-i müteveffâ-yı mezbûra bi’l-verâse vâzı‘-ı yedi mütehakkık olan ibn-i mezbûr İbrahim muvâcehesinde müteveffâ-yı mezbûr Emir Ağa zimmetinde hayatında mâlımdan ve yedimden iktirâz ve kabz ve umûruna sarfla istihlâk eylediği bâ-temessük beş yüz guruş alacak hakkım olmağla meblağ-ı mezkûru mezbûr Emin Ağa kable’l-edâ ve’l-îfâ fevt ve terekesine oğlu mezbûr İbrahim vaz‘-ı yed etmekle meblağ-ı mezkûr beş yüz guruş merkūm İbrahim’in vâzı‘u’l-yed olduğu tereke-i müteveffâ-yı mezbûrdan taleb ederim deyü tasaddî eylediğim da‘vâmdan bâ-tavassut-ı muslihîn mezbûr İbrahim ile bi’t-tav‘ ve’r-rızâ yüz elli guruş üzerine ba‘de-akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz elli guruşu merkūm İbrahim’in vâzı‘u’l-yed olduğu tereke-i müteveffâ-yı mezbûrdan edâya merkūm es-Seyyid Mustafa Ağa’ya tenbîh olunduğu tescîl ve huzûr-ı âlîlerine i‘lâm olundu. Fî 12 Şa‘bân sene 1255