Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 131 Hüküm no: 139 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bedros’un alacaklı olduğu yolundaki iddiasını ispatlayamadığı Mu‘ârazadan men‘ Ma‘rûz Berber tâifesinden Bedros v. Simon nâm zimmî İstanbul [Bâb] Mahkemesi’nde meclis-i şer‘-i hatîrde takyeci esnâfından es-Seyyid Mehmed Sadullah b. Mehmed Memiş nâm kimesne muvâcehesinde merkūm Mehmed Sadullah zimmetinde târîh-i i‘lâmdan altı sene mukaddem duhân kesesi etrâflarına kılâbdan i‘mâli ücretimden yüz yirmi beş guruş alacak hakımın elli guruşunu iki haftada bana edâ ve teslîm ben dahi yedinden ahz u kabz edip bâkīsi olan yetmiş beş guruşu mezbûr es-Seyyid Mehmed Sadullah’dan taleb ederim deyü ba‘de’d-da‘vâ ve’l-inkâr müdde‘î-i mesfûr ber-vech-i muharrer müdde‘âsına ikāmet-i beyyine edemeyip talebiyle merkūm es-Seyyid <> Mehmed Sadullah bi’l-muvâcehe ber-nehc-i şer‘î tahlîf olunmağın mûcebince müdde‘î-i mesfûr Bedros zimmî da‘vâ-yı mezkûresiyle merkūm Mehmed Sadullah’a bilâ-beyyine mu‘ârazadan men‘ olunduğu mübâşirleri Bâb-ı Seraskerî kavaslarından Mısırlı Ârif Kavas kulları yediyle huzûr[-ı âlîlerine i‘lâm olundu] Fî 18 Şa‘bân sene 1255