Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 132 Hüküm no: 142 Orijinal metin no: [17a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeynep Hanım’ın kiracı olarak oturduğu evi boşaltması Menzil tahliyesine tenbîh Ma‘rûz İstanbul’da Yenibahçe kurbünde Keçecipîrî mahallesinde sâkin Mehmed İzzet Efendi b. Yusuf tarafından husûs-ı âtîde vekîl olduğu Mustafa Ağa b. Ömer ve Bayezid Ağa b. Süleyman nâm kimesneler şehâdetleriyle vech-i şer‘î üzere sâbit olan es-Seyyid Mehmed Tevfik Efendi b. es-Seyyid Süleyman nâm kimesne İstanbul Bâb Mahkemesi’nde meclis-i şer‘-i münîrde mu‘arrefetü’z-zât Zeyneb bt. Osman nâm hatun muvâcehesinde müvekkilim mezbûrun [17b] mahalle-i mezbûrede vâki‘ bi’l-icâreteyn mutasarrıf olduğu ma‘lûmü’l-hudûd bir bâb vakıf menzilini işbu târîh-i i‘lâmdan otuz altı ay mukaddem aded-i şuhûr beyân olunmaksızın bilâ-tesmiyeti’l-ücret merkūmân [merkūme] Zeyneb Hatun’a îcâr ve teslîm ol dahi istîcâr ve kabûl etmişidi el-hâletü hâzihî müvekkilim merkūm târîh-i i‘lâm şehri gāyetinde fesh-i akd-i icâre etmekle menzil-i mezkûru gāyet-i şehr-i mezkûr[da] tahliye ve müvekkilim merkūm Mehmed izzet Efendi’ye teslîme tenbîh olunmak bi’l-vekâle murâdımdır deyü da‘vâ ettikde ol dahi cevâbında kaziyye minvâl-i meşrûh üzere olduğunu ikrâr ü i‘tirâf etmeğin mûcebince târîh-i i‘lâm şehri gāyetinde menzil-i mezkûru tahliye ve müvekkil-i merkūma teslîme mezbûre Zeyneb Hatun’a tenbîh olunduğu tescîl ve bi’l-iltimâs huzûr[-ı âlîlerine i‘lâm olundu] Fî 7 Şa‘bân sene [12]55