Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 133 Hüküm no: 143 Orijinal metin no: [17b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manuk ile Artin arasındaki emlak, arazi ve tarla satışında çıkan ihtilafın giderildiği Anadolu’da bahçe ve tarla nizâ‘ı Ma‘rûz Anadolu’da Karahisar-ı şarkī kazâsına tâbi‘ Kirtas? karyesi re‘âyâsından ve hayyât? tâifesinden Manuk v. Vartiyo nâm zimmî İstanbul Bâb Mahkemesi’nde meclis-i şer‘-i hatîrde li-ebeveyn ammi oğlu Artin v. Asvader nâm zimmî muvâcehesinde karye-i mezkûrede vâki‘ lede’l-ahâlî ve’l-cîrân ma‘lûmü’l-hudûd ve’l-müştemilât bir bâb menzil ve menzil-i mezkûr derûnunda mevcûde bâ-defter-i müfredât eşyâ-i ma‘lûme ile eşcâr-ı müsmire ve gayr-ı müsmireli iki kıt‘a bahçenin nısf hisse-i şâyi‘aları mersûm Artin zimmînin ve nısf-ı âharı li-ebeveyn er karındaşı gāib ani’l-beled Haçuk zimmînin yedlerinde mülk ve hakları ve yine karye-i mezbûre sınırı dâhilinde vâki‘ mevâzi‘-i adîdede kâin kezâlik her biri ma‘lûmü’l-hudûd beş kıt‘a tarlaları dahi bi’l-münâsafe mersûmân Artin ve Haçuk zimmîlerin bâ-tapu taht-ı tasarruflarında iken işbu yedimde olup bin iki yüz elli dört senesi Zilhiccetü’ş-şerîfesi’nin yirminci günü târîhiyle müverraha ve ol târîhde İstanbul Mahmudpaşa Mahkemesi’nde hilâfeten müvellâ nâibü’ş-şer‘i’ş-şerîf olan mevâlî-i i‘zâmdan fazîletlü Hemşinî İbrahim Zühdü Efendi’nin imzâ ve hatmini hâviye bir kıt‘a hüccet nâtıka olduğu üzere mesfûr Artin zimmî sâlifü’l-beyân menzil ve bahçelerden ber-vech-i muharrer mâlik olduğu nısf hisse-i şâyi‘a-i ma‘lûmesini üç yüz guruşa bana bey‘ ü temlîk ve zikr olunan beş kıt‘a tarlalarda dahi kezâlik mutasarrıf olduğu nısf hisse-i şâyi‘asını rızâsıyla üç yüz guruş bedel mukābelesinde yine bana ferâğ ve tefvîz ve her birilerini mahallerinde zabt ü tasarrufa taslît eylediğinde ben dahi iştirâ ve temellük ve tefevvüz ve kabûl eyledikden sonra semen ve bedel cem‘an altı yüz guruşu mersûm Artin zimmîye def‘ ü teslîm ol dahi yedimden ahz u kabz edip emlâk ve arazilerde kat‘an alâka ve medhalim (medhali) kalmadığını ikrâr ü i‘tirâf etmişidi el-hâletü hâzihî ferâğ-ı mezkûr sâhib-i arz huzûrunda olmadığından tasarrufa iznini hâvî henüz temessük tahrîr ve temhîr olunmamış ise de ben emlâk ve arazi-i mezkûrelerde ber-vech-i muharrer iştirâ ve teferruğ eylediğim hisse-i ma‘lûmelerimi mahâllinde kabz ve tasarruf üzere iken bu def‘a mersûm Artin zimmî ber-minvâl-i muharrer zabt ü tasarrufa mümâna‘at ve müdâhale eder olmağla suâl olunup muhâlefeti men‘ ü def‘ olunmak murâdımdır deyü takrîr-i meşrûhu üzere evvelen müdde‘î-i mersûm Manuk zimmînin bilâ-izn-i sâhib-i arz ferâğ da‘vâsı meşrû‘a ve iltifâta şâyân olmayıp ancak menzil ve eşya ve bahçelerin bey‘i husûsunda mersûm Artin zimmî istintâk olundukda kaziyye minvâl-i meşrûh üzere olduğunu ikrâr ü i‘tirâf edip lâkin emlâk ve arazilerin ziyâdeye tâlibi olduğundan ben mücerred târîh-i mezkûrda bey‘ ü ferâğıma nâdim ve pişmân olmamla makbûzum olan semen ve bedel cem‘an altı yüz guruşu yedimden ahz birle emlâk ve arazilerden keff-i yed ve bana geri redd ü teslîm etmek üzere mersûm Manuk zimmîye tenbîh olunmak matlûbumdur deyü tasaddî eylediği da‘vâlarından emlâk da‘vâsında bey‘ini ve hüccet-i şer‘iye olunduğunu mukırr u mu‘terif iken eylediği kelâmı def‘e sâlih cevâb-ı şer‘î olmayıp bu sûretde müdde‘î-i mersûm Manuk zimmî arazi-i merkūme da‘vâsıyla mesfûr Artin zimmîye ve mersûm Artin zimmî dahi emlâk-ı muharrere-i mezkûre da‘vâsıyla müdde‘î-i mesfûr Manuk zimmîye her biri âhara bî-vech-i şer‘î mu‘ârazadan ba‘de’l-men‘ mûcebince mesfûr Manuk zimmînin bedel nâmıyla medfû‘u olan meblağ-ı merkūm üç yüz guruşu mersûm Artin zimmîden ahz birle tarlahâ-yı mezkûrenin ber-vech-i muharrer hisse-i merkūmelerinden keff-i yed ve mersûm Artin zimmîye teslîme mesfûr Manuk zimmîye ba‘de’t-tenbîh mersûm Artin zimmî meblağ-ı mezkûr üç yüz guruşu mesfûr Manuk [18a] zimmîye işbu meclis-i şer‘de def‘ ü teslîm ol dahi yedinden ahz u kabz birle zikr olunan tarlada ber-vech-i muharrer hisse-i mezkûreden keff-i yed edip mahâllinde mersûm Artin zimmîye teslîme ta‘ahhüd etmekle ba‘de’l-yevm zikrleri mürûr eden beş kıt‘a tarlanın ber-minvâl-i meşrûh nısf hisse-i mezkûrelerinden mersûm Artin zimmînin ke’l-evvel zirâ‘at ve harâsetini ve mârrü’l-beyân menzil ve eşya ve bahçelerin nısf hisse-i merkūmelerinde ber-vech-i muharrer mülkiyeti mersûm Manuk zimmînin zabt ve tasarrufu iktizâ eylediği huzûr[-ı âlîlerine i‘lâm olundu] Fî 25 Receb sene 1255