Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 149 Hüküm no: 171 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todori v. Yorgi’nin borcunu ödemesi 1667,5 guruşa hüküm Ma‘rûz Kaymakçı İstonko v. İstanco nâm zimmî İstanbul Bâb Mahkemesi’nde meclis-i şer‘de Todori v. Yorgi nâm zimmî muvâcehesinde mersûm Todori zimmî zimmetinde cihet-i karzdan iki bin dört yüz kırk yedi buçuk guruş alacak hakkım olup hattâ bin iki yüz elli dört senesi şehri Ramazani’l-mübârekinin on beşinci günü cihet-i mezkûreden bana deyni olduğunu ikrâr ü i‘tirâf eyledikden sonra meblağ-ı mezkûr iki bin dört yüz kırk yedi buçuk guruşun sekiz yüz guruşunu mukaddemâ mersûmun yedinden kabz ve istîfâ etmemle bâkīsi bin altı yüz yetmiş yedi buçuk guruşu zimmî-i mersûmdan hâlâ taleb ederim deyü da‘vâ ettikde ol dahi cevâbında târîh-i mezkûrede müdde‘î-i mersûma ol mikdâr guruş zimmetimde deynim olduğunu ikrâr etmişidim lâkin meblağ-ı mezkûrun dört yüz altmış yedi buçuk guruşu bilâ-devr ribâ-yı mahzdır deyü müdde‘î-i mersûmun inkârına mukārin eylediği def‘ine ikāmet-i beyyine edemeyip bi’t-taleb mersûm İstonko zimmîye bi’l-muvâcehe vech-i şer‘î üzere yemîn verilmeğin mûcebince dâfi‘-i mersûm def‘-i mezkûruyla mersûm İstonko zimmîye bilâ-beyyine mu‘ârazadan ba‘de’l-men‘ mesfûr Todori zimmînin sâlifü’l-beyân ikrâr ü i‘tirâfıyla lâzım gelen meblağ-ı bâkī-i mezkûr bin altı yüz altmış yedi buçuk guruşun müdde‘î-i mersûm İstonko zimmîye edâsıyla mersûm Todori zimmî ilzâm olunduğu mübâşirleri Bâb-ı Seraskerî kavaslarından Taşabâdî Veliyyüddin Kavas kulları yediyle huzûr[-ı âlîlerine i‘lâm olundu] Fî 5 Ramazan sene [12]55