Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 150 Hüküm no: 173 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Nikola’nın borcunu ödemesi 310 guruşa hüküm Ma‘rûz Bâ‘isü’l-i‘lâm Mehmed Reis b. Hüseyin nâm kimesne İstanbul Bâb Mahkemesi’nde meclis-i şer‘de bakkāl tâifesinden Nikola v. Kiryako nâm zimmî muvâcehesinde mersûm Nikola zimmî bundan akdem beher vakıyyesi beşer buçuk guruşa olarak mâlından bana kable’l-vezn dört yüz vakıyye şem‘-i rugan bey‘ ü teslîm eylediğinde ben dahi ber-vech-i muharrer iştirâ ve kabz eylediğimden sonra semeni olan meblağ-ı mecmû‘-ı mezkûr bin sekiz yüz guruş kendiye tamâmen edâ ve teslîm ol dahi yedimden ahz u kabz edip zikr olunan şem‘-i ruganı vezn eylediğimde seksen vakıyye noksân gelmekle semen-i mezkûrdan mersûm Nikola zimmîye ziyâde medfû‘um olan dört yüz kırk guruşun yüz otuz guruşu benim mersûm Nikola zimmîye zimmetinde bakkāl erzâkı semeninden deynim olan yüz otuz guruşa ba‘de’t-takās bâkīsi olan üç yüz on guruşu mersûm Nikola zimmîden hâlâ istirdâd ederim deyü da‘vâ ettikde ol dahi cevâbında külliyen inkâr etmekle müdde‘î-i merkūm Mehmed Reis ber-vech-i muharrer müdde‘âsına ikāmet-i beyyine edemeyip mersûm Nikola zimmîye bi’l-muvâcehe vech-i şer‘î üzere yemîn teklîf olundukda ol dahi yemînden nükûl etmeğin mûcebince meblağ-ı bâkī-i mezkûr üç yüz on guruşun müdde‘î-i merkūm Mehmed reis’e edâ ve teslîme mesfûr Nikola zimmîye tenbîh olunduğu mübâşirleri Bâb-ı Seraskerî kavaslarından Emin Kavas kulları yediyle huzûr[-ı âlîlerine i‘lâm olundu] Fî 13 Ramazan sene [12]55