Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 150 Hüküm no: 174 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Said Bey’in İbrahim Edhem Ağa’dan alacaklı olduğu yolundaki iddiasını ispatlayamadığı Bilâ-beyyine-i şer‘î mu‘ârazadan men‘ Ma‘rûz Bâ‘isü’l-i‘lâm es-Seyyid Mehmed Said Bey b. es-Seyyid Mehmed Nazif nâm kimesne İstanbul Bâb Mahkemesi’nde meclis-i şer‘-i münîrde berber esnâfından İbrahim Edhem Ağa b. Abdullah nâm kimesne muvâcehesinde benim gāib ani’l-beled es-Seyyid Mustafa nâm kimesne zimmetinde cihet-i karzdan beş yüz yirmi üç guruş alacak hakkım olup târîh-i i‘lâmdan beş ay mukaddem meblağ-ı mezkûru gāib-i merkūmdan kabz ve makbûzunu bana irsâl ve îsâle tarafımdan merkūm İbrahim Edhem Ağa’yı vekîl ve nâib-i menâb nasb ü ta‘yîn eylediğimde ol dahi vekâlet-i mezkûreyi ba‘de’l-kabûl meblağ-ı mezkûru gāib-i merkūm es-Seyyid İsmail Ağa’dan tamâmen ahz u kabz etmiş iken bana vermeyip yedinde kalmağla meblağ-ı mezkûru merkūm İbrahim Edhem Ağa’dan hâlâ taleb ederim deyü da‘vâ ettikde ol dahi cevâbında ber-vech-i muharrer <> ikrâr lâkin ben makbûzum olan meblağ-ı mezbûr beş yüz yirmi üç guruşu bundan akdem Aksaray’da kahve dükkânında müdde‘î-i merkūm Mehmed Said Bey’e tamâmen edâ ve teslîm etmişidim deyü eylediği def‘inde merkūm İbrahim Edhem Ağa yemîniyle tasdîk olunur ümenâdan olmağla üzerine redd-i zamân lâzım gelmediğine bi’l-muvâcehe vech-i şer‘î üzere bi’t-taleb tahlîf olunmağın mûcebince müdde‘î-i merkūm Mehmed Said Bey da‘vâ-yı mezkûresiyle merkūm İbrahim Edhem Ağa’ya bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 14 Ramazan sene [12]55