Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 165 Hüküm no: 199 Orijinal metin no: [26a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yağcı Sünbül’ün açtığı alacak davasının geçersiz olduğu Da‘vâsı adem-i iltifât olduğunu kendiye tefhîm sonra ibrâ Ma‘rûz Arzuhâl eden Yağcı Sünbül v. Hıristo nâm zimmî İstanbul Bâb Mahkemesi’nde meclis-i şer‘-i hatîrde derûn-ı arzuhâlde mezkûrü’l-ism Çörekçi es-Seyyid <<İbrahim>> Mehmed b. Ahmed nâm kimesne muvâcehesinde çörekçi esnâfından olup Tahtakale kurbünde çörekçi dükkânında sâkin iken bundan akdem fevt olan Mehmed Ağa zimmetinde hayatında mâlından ve yedinden [mâlımdan ve yedimden] iştirâ ve kabz eylediği revgan-ı çerviş semeninden bin altı yüz seksen guruş alacak hakkım olup meblağ-ı mezkûru mezbûr Mehmed Ağa kable’l-edâ ve’l-îfâ fevt olup mücerred merkūm es-Seyyid Mehmed Ağa müteveffâ-yı mezbûrun hemşehrisi olmağla öyle olacak benim müteveffâ-yı mezbûrun zimmetinde ber-vech-i muharrer alacağım olan meblağ-ı mezkûr bin altı yüz seksen guruşu bana mâlından edâ etmek üzere merkūm es-Seyyid Mehmed’e cebr olunsun deyü bundan akdem da‘vâya tasaddî etmişidim el-hâletü hâzihi takrîr-i meşrûhum üzere tasaddî eylediğim da‘vâm meşrû‘a ve iltifâta şâyân olmadığı kıbel-i şer‘den bana tefhîm olunup ben dahi mücâb ve mülzim olmamla husûs-ı mezkûra ve hukūk-ı sâire-i şer‘iyeye müte‘allika âmme-i da‘vâdan mezbûr el-Hâc Mehmed’in zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledim deyü ikrâr ve tasdîkleri tescîl ve huzûr-ı âlîlerine i‘lâm olundu. Fî 16 Şa‘bân sene [12]55