Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 166 Hüküm no: 201 Orijinal metin no: [26b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sunullah Ağa’nın nafaka ödemesi Nafaka Ma‘rûz İstanbul’da Sultanahmed kurbünde <> Dizdâriye mahallesinde sâkine sâhibe-i arzuhâl Şerife Zeliha Hanım bt. es-Seyyid Ali’nin vâlidesi ve tarafından husûs-ı âti’l-beyânda vekîl olduğu zâtını ârifân es-Seyyid Mehmed Said Efendi b. Mehmed Ârif ve İbrahim Edhem Ağa b. Mustafa nâm kimesneler şehâdetleriyle bi’l-muvâcehe ber-nehc-i şer‘î sâbit olan Âişe bt. Mehmed nâm hatun İstanbul Bâb Mahkemesi’nde meclis-i şer’de müvekkile-i mezbûrenin zevc-i sâbıkı enderûn-ı hümâyûndan muhrec derûn-ı arzuhâlde mezkûrü’l-ism Sunullah Ağa b. Ahmed muvâcehesinde mezbûr Sunullah Ağa ile müvekkilem mezbûrenin mukaddemâ zevciyyet beynlerinde kāime iken mezbûrun firâşından hâsıl ve müvekkilem mezbûreden mütevellid ve bi-hakkı’l-hıdâne hâlâ hacr ü terbiyesinde olan yedi günlük es-Seyyid Hasan nâm sagīrin aslâ mâlı olmayıp nafaka ve kisveye eşedd-i ihtiyâc ile muhtâc olmağla sagīr-i mezbûrun nafakasi’çün babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak müvekkilem mezbûrenin bi’l-hıdâne matlûbudur dedikde ol dahi ba‘de’t-tasdîk sagīr-i mezbûrun nafakasi’çün babası mezbûr üzerine kıbel-i şer‘den bi’t-terâzî beher şehr kırk guruş farz ve takdîr olunup meblağ-ı mefrûz-ı mezkûru sagīr-i mezbûrun <> [nafaka] ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr üzerine rücû‘a vâlidesi ve hâdinesi müvekkile-i mezbûre Şerife Zeliha Hanım’a izâfetle vekîl-i merkūme Âişe Hatun’a izin verildiği huzûr[-ı âlîlerine i‘lâm olundu] Fî 22 Ramazan sene [12]55