Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 168 Hüküm no: 205 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Fâtıma Hanım’ın kocasına aid eşyaları iade etmesi Zevcenin yedinde olan eşyayı teslîme tenbîh Ma‘rûz Bâ‘isü’l-i’lâm Mehmed Halim Ağa b. Süleyman nâm kimesne İstanbul Bâb Mahkemesi’nde meclis-i şer‘-i enverde hâlâ zevci [zevcesi] mu’arrefetü’z-zât Şerife Fâtıma Hanım bt. el-hâzır es-Seyyid Halil Efendi b. es-Seyyid Mehmed muvâcehesinde mezbûre Şerife Fâtıma Hanım ile mahrûse-i Galata’ya muzâfe kasaba-i Tophâne’de Ekmekçibaşı mahallesinde ma‘an sâkinler olduğum menzilde mevcûde eşyâ-i memlûkemden fuzûlî ahz ve âhar menzile nakleylediği mecmû‘u iki bin dokuz yüz altmış guruş kıymetli on çatma yasdık ve üç yeni çuka mak‘ad ve dört basma koltuk yasdığı ve bir erkân minderi ve dört basma perde ve iki kıyye pamuk ve yün memlü bir döşek ve bir basma şilte ve yün memlü baş yasdığı ve bir yorgan ma‘a çârşeb ve bir yatak bağı ve bir köhne fes ve bir kahve değirmeni ve bir şilte [ve] bardak ve bir Saksonya kâse ve üç kebîr tabak ve on aktar tabağı ve bir kehribâ çubuk takımı ve bir sargılı çubuk ve bir köhne nâfe kürk ve iki basma anteri ve bir basma yelek ve bir merinoz Çerkes hırkası ve bir şam‘dân ve bir polat mum tepsisi ve bir konak dolabı ve bir şemsiye ve bir nühâs fener ve bir küp ve iki çuval ve iki Frenk çizme zevcem mezbûrenin hâlâ yedinde mevcûd olmağla eşyâ-i muharrere-i mezkûreyi aynen bana teslîme zevcem mezbûreye tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin <> mûcebince eşyâ-i muharrere-i mezkûreyi zevci müdde‘î-i mezbûra aynen def‘ ü teslîme mezbûre Şerife Fâtıma Hatun’a tenbîh olunduğu mübâşirleri Bâb-ı âlî kavaslarından Tırnovili Hüseyin Kavas kulları yediyle huzûr[-ı âlîlerine i‘lâm olundu] Fî 15 Şevvâl sene [12]55