Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 171 Hüküm no: 211 Orijinal metin no: [27b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocasından boşanan Nefise Hatun’un ergenliğe erişen kızını babasına teslim etmesi Sagīreden hakk-ı hıdâne sâkıt olmağla babasına teslîme tenbîh i‘lâmı Ma‘rûz Bâ‘isü’l-i’lâm es-Seyyid Mehmed Efendi b. es-Seyyid İsmail İstanbul Bâb Mahkemesi’nde meclis-i şer‘-i münîrde zikri âtî mürâhıkanın ceddesi mu’arrefetü’z-zât Nefise bt. es-Seyyid İbrahim nâm hatun muvâcehesinde mezbûre Nefise Hatun sadriye kebîre kızı işbu hâzıratü bi’l-meclis zâtı mu‘arrefe Şerife Azime bt. el-Hâc Halil nâm hatun ile mukaddemâ zevciyyet beynimizde kāim iken benim firâşımdan hâsıl ve hâzıra-i merkūmeden mütevellide sulbiye kızım kezâlik hâzıratü bi’l-meclis tahmînen on iki yaşında Şerife Nefise nâm mürâhıka ceddesi mezbûre Nefise Hatun’un bi-hakkı’l-hıdâne hacr ü terbiyesinde iken bundan akdem mürâhıka-i mezbûre hıdâneden sâkıta ve kendiye istiğnâ hâsıl olmuş iken bu def‘a ceddesi mezbûre Nefise Hatun mürâhıka-i mezbûreyi bana teslîmden imtinâ‘ etmekle mürâhıka-i mezbûreyi bana teslîme mezbûre Nefise Hatun’a tenbîh olunmak matlûbumdur deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince mürâhıka-i mezbûreyi babası mezbûr es-Seyyid Mehmed Efendi’ye teslîme ceddesi mezbûre Nefise Hatun’a tenbîh olunduğu mübâşirleri Bâb-ı Seraskerî kavaslarından Kayseriyeli İsmail Kavas kulları yediyle huzûr[-ı âlîlerine i‘lâm olundu] Fî 18 Şevvâl sene [12]55