Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 172 Hüküm no: 212 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan v. İzviriko’nun kendisini döven Luka ile 30 kuruş karşılığında sulh olduğu Darb da‘vâsından 30 guruşa sulh Ma‘rûz Dobniçeli Yuvan v. İzviriko nâm zimmî İstanbul Bâb Mahkemesi’nde meclis-i şer‘-i hatîrde sucukçu tâifesinden Luka v. Yorgi nâm zimmî muvâcehesinde mersûm Luka zimmî târîh-i i‘lâmdan yirmi gün mukaddem İstanbul hısnı ebvâbından Yedikule kapısı hâricinde mumcular içinde vâki’ mütemekkin olduğum sucukçu dükkânının odasına gelip li-ebeveyn er karındaşı gāib-i ani’l-meclis Andon zimmî ile gavga esnâsında ben beynlerini tesviye ve tanzîm içün aralarına girdiğimde mersûm Luka zimmî çubuk ile başıma ve depme ile arkama ve boş böğrüme ve batnıma amden bi-gayri hak darb ile darb-ı mezkûrdan nâşî hasta ve sâhib-i firâş ve kal[k]makdan kisbden âciz olmamla mûcib-i şer‘îsini taleb ederim deyü da‘vâya tasaddî etmişidim el-hâletü hâzihi mersûm Luka zimmî bana mâlından alâ-tarîkı’s-sulh otuz guruş def‘ ü teslîm eylediğinde ben dahi yedinden ahz u kabz ve emriyle umûruma sarfla istihlâk etmemle bi’l-cümle husûs-ı mezkûra ve mâ-yuhdesü anha müte‘allika da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledim [eyledik] deyü ikrâr ve tasdîkleri tescîl ve huzûr[-ı âlîlerine i‘lâm olundu] Fî 18 Ramazan sene [12]55