Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 179 Hüküm no: 223 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın Berber Ahmed’den alacaklı olmadığı Bilâ-beyyine mu‘ârazadan men‘ Ma‘rûz İstanbul’da Küçükpazar kurbünde Hocahayreddin mahallesinde sâkine Âişe bt. İsmail b. Abdullah’ın vâlidesi ve tarafından husûs-ı âti’l-beyânda vekîl olduğu zâtını ârifân mahalle-i mezbûre Muhtar-ı sânîsi es-Seyyid Mehmed Ağa b. Ömer ve Mehmed Salih Ağa b. Osman nâm kimesneler şehâdetleriyle ber-nehc-i şer‘î sâbit olan derûn-ı arzuhâlde mezkûretü’l-ism Fâtıma bt. Halil nâm hatun bi’t-terâzî İstanbul Bâb Mahkemesi’nde meclis-i şer’de sâhib-i arzuhâl Berber el-Hâc Ahmed b. Mehmed nâm kimesneler muvâcehesinde kızım müvekkilem mezbûrenin İstanbul’da Kantarcılarbaşı nâm mahâlde vâki’ mutasarrıfe olduğu bir bâb berber dükkânında mezbûr el-Hâc Mehmed bundan akdem müsteciri olduğu hînde dükkân-ı mezkûrda mevcûd kızım müvekkilem mezbûrenin mâlından seksen dört guruş kıymetli iki nargile ve bir çubuğunu fuzûlî ahz ve istihlâk etmekle kıymet-i mezkûreleri olan seksen dört guruşu merkūm el-Hâc Ahmed’den hâlâ taleb ederim deyü da‘vâ ettikde ol dahi cevâbında inkâr etmekle müdde‘iyye-i mezbûre ber-vech-i muharrer müdde‘âsına ikāmet-i beyyine edemeyip bi’t-taleb merkūm el-Hâc Ahmed bi’l-muvâcehe vech-i şer‘î üzere tahlîf olunmağın mûcebince müdde‘iyye-i mezbûre bi’l-vekâle da‘vâ-yı mezkûresiyle merkūm el-Hâc Ahmed’e bilâ-beyyine mu‘ârazadan men‘ olunduğu huzûr[-ı âlîlerine i‘lâm olundu] Fî 19 Şevvâl sene [12]55