Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 178 Hüküm no: 222 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ferhad Ağa ve arkadaşlarının Mehmed b. Süleyman’daki alacaklarını kardeşinden istemelerinin geçersiz olduğu Mücerred karındaşı olmağla bana versin deyü meşrû‘a olmadığı Ma‘rûz İplikçi esnâfından derûn-ı arzuhâlde isimleri mezkûr Ferhad Ağa b. Abdullah ve Halil Ağa b. Halil ve Mehmed Ağa b. Hasan ve Mustafa Ağa b. el-Hâc Süleyman ve es-Seyyid Mehmed Ağa b. İbrahim nâm kimesne[ler] İstanbul Bâb Mahkemesi’nde meclis-i şer‘-i münîrde sâhib-i arzuhâl Mehmed b. Süleyman nâm kimesne muvâcehesinde bizim merkūm Mehmed’in li-ebeveyn er karındaşı olup gāib-i ani’l-meclis Ahmed zimmetinde iki bin yetmiş guruş alacak hakkımız olup gāib-i mezbûr meblağ-ı mezkûru henüz bize edâ etmeksizin karındaşı işbu mezbûr Mehmed’e zimmetinde olan bin sekiz yüz yirmi guruş deyni[ni] bundan akdem te’diye ve teslîm etmişidi el-hâletü hâzihi mücerred mezbûr Mehmed gāib-i mezbûr Ahmed’in karındaşı olmağla ber-vech-i muharrer alacağımız olan meblağ-ı mezkûr iki bin yetmiş guruşu bize edâ ve teslîm etmek üzere merkūm Mehmed’e cebr olunsun deyü takrîr-i meşrûhu üzere tasaddî eylediği [eyledikleri] da‘vâları mesmû‘a ve iltifâta şâyân olmadığı müdde‘ûn-ı mezbûrûna tefhîm ve da‘vâ-yı mezkûreleriyle merkūm Mehmed’e bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 18 Şevvâl sene [12]55