Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 180 Hüküm no: 225 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mudanyalı Ali ile İbrahim Ağa’nın zimmet ibrası İbrâ Ma‘rûz Asâkir-i bahriyeden sâhib-i arzuhâl Mudanyalı Ali b. İsmail nâm kimesne İstanbul Bâb Mahkemesi’nde meclis-i şer‘-i münîrde derûn-ı arzuhâlde mezkûrü’l-ism İbrahim Ağa b. İbrahim nâm kimesne muvâcehesinde mezbûr İbrahim Ağa bin iki yüz kırk yedi senesi hilâlinde zikr olunan Mudanya kasabasında voyvoda iken asâkir-i bahriye içün bâ-fermân-ı âlî matlûb buyurulan ma‘lûmü’l-mikdâr asâkirden nefs-i Mudanya kasabasına isâbet eden elli üç nefer münâsib olanlardan cem‘ ü tekmîl ve sebt ü defter olundukdan sonra mûmâ-ileyh İbrahim Ağa kasaba-i mezbûre sâkinlerinden Kürt Bekir nâm kimesnenin oğlunu askeriyeden ihrâc ve beni yerine tahrîr ve nasb eylediği esnâda merkūm Kürt Bekir benim oğlumu askeriyeden tahlîs eyledin deyü mâlından ağa-yı mûmâ-ileyhe bin üç yüz elli guruş verip meblağ-ı mezkûr bin üç yüz elli guruşun yüz yirmi guruşunu üzerimize memûr mübâşir yediyle Tersâne-i âmire’ye duhûlümüzde bana teslîm edip bâkīsi olan bin iki yüz otuz guruşu merkūm İbrahim Ağa’dan taleb ederim deyü da‘vâya tasaddî etmişidim el-hâletü hâzihi meblağ-ı mezkûr bin iki yüz otuz guruşun hakk-ı kabzı gāib-i merkūm Kürt Bekir’in olduğundan gāib-i merkūmun huzûru lâzım olmağla ol vechile ben mezbûr İbrahim Ağa’ya hasm-ı şer‘î olmadığım kıbel-i şer‘den bana tefhîm olunup ancak mezbûr İbrahim Ağa bana mâlından teberru‘an işbu meclis-i şer’de elli guruş def‘ ü teslîm ben dahi yedinden ahz u kabz ve emriyle umûruma sarfla istihlâk etmemle bi’l-cümle zikr olunan husûsa ve meblağ-ı müstehlek-i merkūmun istirdâdına ve sâir cemî‘ hukūk-ı şer‘iyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri tescîl ve huzûr[-ı âlîlerine i‘lâm olundu] Fî 18 Şevvâl sene 1255