Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 181 Hüküm no: 226 Orijinal metin no: [30a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın hanımının mehr-i muaccelini ödemesi 300 guruş mu‘accel hükmü Ma‘rûz İstanbul’da Kaliçeciler köşkü kurbünde Öksüzcehatib mahallesinde sâkine mu’arrefetü’z-zât Şerife Behiye bt. es-Seyyid Mehmed nâm hatun İstanbul Bâb Mahkemesi’nde meclis-i şer’de hâlâ zevci es-Seyyid Ali b. Halil nâm kimesne muvâcehesinde ben bundan akdem nefsimi yedi yüz elli bir guruş mehr-i mu‘accel ve üç yüz yetmiş beş guruş mehr-i müeccel tesmiyeleriyle mezbûr es-Seyyid Ali’ye tezvîc ve tenkîh eylediğimde ol dahi tezevvüc ve kabûl edip lâkin mehr-i mu‘accel-i mezkûrumu henüz bana edâ ve îfâ etmemekle mu‘accel-i mezkûrum olan yedi yüz elli bir guruşun dört yüz elli bir guruş mütâlebesine müte‘allika da‘vâdan zevcim mezbûrun zimmetini kabûlü hâvî ibrâ ve iskāt etmemle bâkīsi olan üç yüz guruşu bana edâya zevcim mezbûra tenbîh olunmak murâdımdır deyü da‘vâ ettikde ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin mûcebince mehr-i mu‘accel-i mezkûrdan bâkī üç yüz guruşu zevcesi müdde‘iyye-i mezbûre Şerife Behiye Hatun’a edâya mezbûr es-Seyyid Ali Ağa’ya tenbîh olunduğu huzûr[-ı âlîlerine i‘lâm olundu] Fî 5 Şevvâl sene [12]55