Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 181 Hüküm no: 227 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Hüseyin’in borcunu ödemesi 130 guruşa sulh Ma‘rûz Sâhib-i arzuhâl Manav Abdullah b. Ahmed nâm kimesne zevcesi Hafize Hatun bt. Hasan hâzır olduğu hâlde İstanbul’da Bâb Mahkemesi’nde meclis-i şer‘-i münîrde derûn-ı arzuhâlde mezkûrü’l-ism <> etbâ‘îden Ahmed b. Hüseyin nâm kimesne muvâcehesinde mezbûr Ahmed zimmetinde bundan akdem mâlımdan ve yedimden iktirâz ve kabz ve umûruna sarfla istihlâk eylediği yüz seksen guruş alacak hakkım olmağla meblağ-ı mezkûru mezbûr Ahmed’den hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr Ahmed ile bi’t-tav‘ ve’r-rızâ yüz otuz guruş üzerine ba‘de akdi’l-musâlaha ve’l-kabûl bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyeye müte‘allika da‘vâdan ben hâzıra-i merkūmeden her birimiz mezbûr Ahmed’in zimmetini ol dahi kezâlik husûs-ı mezkûra ve târîh-i merkūma gelince sâir cemî‘ hukūk-ı şer‘iye müte‘allika âmme-i da‘vâdan benimle zevcem hâzıra-i merkūmenin zimmetlerimizi her birimiz ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik ba‘de’l-ikrâr ve’t-tasdîk ibrâdan müstesnâ bedel-i sulh-ı mezkûr yüz otuz guruşun mezbûr Abdullah’a edâ ve teslîmiyle mezbûr Ahmed ilzâm olunduğu <<İstanbul>> huzûr[-ı âlîlerine i‘lâm olundu] Fî 19 Şevvâl sene 1255