Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 193 Hüküm no: 246 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Efendi’nin borcunu ödemesi 658 guruş hüküm Ma‘rûz Hâlâ Kengiri (Çankırı) sancağı Müşîri devletlü âtıfetlü Davud Paşa hazretlerinin kitâbet hizmetlerinde müstahdem İbrahim Efendi b. İsmail b. Abdullah’ın kayın pederi ve tarafından husûs-ı âti’l-beyânda vekîl olduğu es-Seyyid Abdullah Efendi b. Ataullah ve Mehmed Ağa b. İbrahim nâm kimesneler şehâdetleriyle ber-nehc-i şer‘î sâbit olan Mehmed Keşşaf Efendi b. Osman nâm kimesne İstanbul Bâb Mahkemesi’nde meclis-i şer‘-i münîrde el-Hâc Mustafa Efendi b. Ahmed nâm kimesne muvâcehesinde müvekkilim merkūm İbrahim Efendi’nin merkūm el-Hâc Mustafa Efendi zimmetinde bâ-temessük cihet-i karzdan bin guruş alacak hakkı olmağla meblağ-ı mezkûrun üç yüz kırk iki guruşunu mukaddemâ bi’l-vekâle kabz ü istîfâ etmemle bâkīsi olan altı yüz elli sekiz guruşu merkūm el-Hâc Mustafa Efendi’den bi’l-vekâle hâlâ taleb ederim deyü ba‘de’d-da‘vâ ve’l-istintâk ol dahi cevâbında kaziyye minvâl-i muharrer üzere olduğunu ikrâr ü i‘tirâf etmeğin alâ-mûcibi i‘tirâfihi meblağ-ı bâkī-i mezkûr altı yüz elli sekiz guruş müvekkil-i merkūm İbrahim Efendi içün vekîl-i merkūm Mehmed Keşşaf Efendi’ye edâ ve teslîme merkūm el-Hâc Mustafa Efendi’ye tenbîh olunduğu mübâşirleri Bâb-ı Seraskerî kavaslarından Mustafa Kavas kulları yediyle huzûr[-ı âlîlerine i‘lâm olundu] Fî 25 Şevvâl sene [12]55