Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 192 Hüküm no: 245 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ali’nin eşyalarının yanlışlıkla başkasına satıldığı gerekçesiyle açtığı davanın geçersiz olduğu 485 guruş Sarrâf Mıgırdıç zimmînin men‘i Ma‘rûz Asâkir-i mansûreden es-Seyyid Ali b. Hüseyin nâm kimesne İstanbul Bâb Mahkemesi’nde meclis-i şer‘-i münîrde sarrâf tâifesinden olup Kebabçı Hanı’nda mütemekkin Mıgırdıç v. Karabet nâm zimmî muvâcehesinde mültezim tâifesinden olup bundan akdem gaybet-i mutlaka ile gāib olan Ahmed Nadir Efendi nâm kimesnenin yanında ben hizmetkârı olduğum esnâda gāib-i merkūm Ahmed Nadir Efendi İstanbul’da Mahmudpaşa mahallesinde gāib ani’l-meclis es-Seyyid İbrahim Efendi’nin konağında müsteciren sâkin iken gaybûbet-i mutlaka ile gāib oldukdan sonra gāib-i merkūmun mâlı olup menzil-i mezkûr derûnunda mevcûd eşyâsı ber-vech-i âtî bey‘ olunur oldukda benim dahi mâlım olan üç yüz seksen beş guruş kıymetli iki aded başlık ve bir eğer ve elli beş guruş kıymetli bir yorgan ve kırk beş guruş kıymetli bir kâğıd mikrâsımı gāib-i mezbûrun mâlı olmak üzere ben hâzır olduğum hâlde tahrîr ve semen-i misilleriyle âhara bey‘ ve esmânı gāib-i merkūmun hâli mütebeyyin oluncaya değin kıbel-i şer‘den kayyım nasb olunan mesfûr Mıgırdıç zimmî yedine li-ecli’l-hıfz îdâ‘ ve teslîm olunmuşidi el-hâletü hâzihi eşyâ-i muharrere-i mezkûremin kıymetleri olan cem‘an dört yüz seksen beş guruşu mesfûr Mıgırdıç zimmîden damânen taleb ederim deyü tasaddî eylediği da‘vâsı [vech-i] meşrûh üzere meşrû‘a ve iltifâta şâyân olmadığı müdde‘î-i merkūm es-Seyyid Ali’ye tefhîm ve da‘vâ-yı mezkûresiyle kayyım-ı mesfûr Mıgırdıç zimmîye bî-vech-i şer‘î mu‘ârazadan men‘ olunduğu huzûr[-ı âlîlerine i‘lâm olundu] Fî 27 Şevvâl sene [12]55