Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 194 Hüküm no: 248 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın eski eşi Şerife Emine’ye olan borcunu ödemesi 150 guruş hüküm Ma‘rûz İstanbul’da Hocapaşa kurbünde Karakî Hüseyinağa mahallesinde sâkine mu’arrefetü’z-zât Şerife Emine bt. Mehmed Salih nâm hatun İstanbul Bâb Mahkemesi’nde meclis-i şer‘-i münîrde zevc-i sâbıkı na‘lbur esnâfının Kethüdâsı Halil Ağa b. Mehmed nâm kimesne muvâcehesinde mezbûr Halil Ağa ile mukaddemâ zevciyyet beynimizde kāime iken mezbûrun firâşından hâsıl ve benden mütevellide ve bi-hakkı’l-hıdâne hacr ü terbiyemde olan sulbiye kızı Şerife Fâtıma nâm sagīrenin bâ-hüccet-i şer‘iye beher şehr kırk beş guruş nafaka-i mukaddere-i mefrûza-i müstedânesinden sene-i sâbıkā yani bin iki yüz elli dört senesi Zilhiccetü’ş-şerîfesi’nin yirmi dördüncü gününden işbu bin iki yüz <> elli beş senesi Şevvâli’l-mükerremi’nin dokuzuncu gününe gelince dokuz buçuk ay müddetle mezbûrun zimmetinde müctemi‘ <> bi’l-mürâca‘a hakkım olan dört yüz yirmi yedi buçuk guruşun yetmiş guruşunu mukaddemâ mezbûrun yedinden kabz ve iki yüz yedi buçuk guruş mütâlebesine müte‘allika da‘vâdan mezbûr Halil Ağa’nın zimmetini kabûlü hâvî ibrâ ve iskāt etmemle bâkīsi olan yüz elli guruşu merkūm Halil Ağa’dan hâlâ taleb ederim deyü ba‘de’d-da‘vâ ve’l-ikrâr alâ-mûcibi ikrârihi meblağ-ı bâkī-i mezkûr yüz elli guruşun müdde‘iyye-i mezbûre Şerife Emine Hatun’a edâ ve teslîmiyle mezbûr Halil Ağa ilzâm olunduğu bi’l-iltimâs huzûr-ı âlîler[ine i‘lâm olundu] Fî 9 Şevvâl sene [12]55