Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 194 Hüküm no: 249 Orijinal metin no: [33a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtımatüzzehra Hanım’ın iki çocuğunun bakımını üstlenerek kocasından muhalaa yoluyla boşandığı Sagīrânı kendi mâlından infâk etmek üzere muhâla‘a Ma‘rûz-ı dâ‘î-i Devlet-i aliyyeleridir ki İstanbul’da eş-Şeyh Ebulvefâ Câmi‘-i şerîfi kurbünde Mollahüsrev mahallesinde sâkine mu’arrefetü’z-zât Fâtımatüzzehrâ bt. Osman nâm hatun İstanbul Bâb Mahkemesi’nde meclis-i şer‘-i münîrde zevc-i muhâlı‘ı Süleyman Ağa b. Abdullah nâm kimesne muvâcehesinde mezbûr Süleyman Ağa zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mütekarrir ve ma‘kūdün-aleyh mehr-i müeccel hakkım olan beş yüz guruş ile nafaka-i iddet-i mu‘ayyene-i ma‘lûmem üzerlerine olduğundan mâ‘adâ zevcim merkūmun firâşından hâsıllar ve benden mütevellidler sulbiye kızı sekiz buçuk yaşında Necibe ve 5 yaşında Ahmed nâm sagīrân[dan] mezbûre Necibe dokuz yaşını ve mezbûr Ahmed dahi yedi yaşını tekmîl edinceye değin kendi mâlımdan infâk ve iksâ edip eğer sagīretân-ı mezbûrân kable-tamâmi’l-müdde fevt olurlar ise nafaka-i bakiyelerinden zimmetim berîe olmak üzere zevcim mezbûr Süleyman Ağa ile muhâla‘a-i sahîha-i şer‘iye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyyete ve ibtidâ-i zevciyyetimizden işbu târîhe gelince sâir cemî‘ hukūk-ı şer‘iye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri mübâşirleri Bâb-ı Seraskerî kavaslarından Nevşehirli Ömer Kavas kulları yediyle huzûr[-ı âlîlerine i‘lâm olundu] Fî 25 Şevvâl sene [12]55