Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 214 Hüküm no: 284 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Harun’un alacak iddiasıyla Karabet v. Toros’a açtığı davada sulh oldukları 100 guruş sulh Ma‘rûz Anadolu’da Akhisar-ı Geyve kazâsına tâbi‘ Korupeltek? karyesi re‘âyâsından arzuhâl eden Karabet v. Harun nâm zimmî İstanbul Bâb Mahkemesi’nde meclis-i şer‘de derûn-ı arzuhâlde mastûrü’l-ism diğer Karabet v. Toros nâm zimmî muvâcehesinde karye-i mezbûre hudûdu dâhilinde Yarıkkaya nâm mahâlde Belazoğlu tarlası demekle arîf bir kıt‘a tarla benim taht-ı tasarrufumda ve derûnunda mağrûs üç sâk kiras eşcârı dahi yedimde mâlım iken mesfûr Karabet zimmî zikr olunan tarla ile kiras eşcârını bir müddetden beri fuzûlî zabt ve zikr olunan tarlayı hırâset ve zirâ‘at ve mârrü’l-beyân kiras eşcârının mahsûlünü ahzeylediğinden mâ‘adâ zikr olunan eşcârı dahi bundan akdem kat‘ ve âhara bey‘le istihlâk etmekle müddet-i ma‘lûmede mahsûl-i müstehleki olan üç bin altı yüz guruş ve mârrü’l-beyân üç sâk eşcârın kıymetleri olan yedi yüz yirmi guruş ki cem‘an dört bin üç yüz yirmi guruş ile tarla-yı mezkûrun noksân-ı kıymetini mersûm <> diğer Karabet zimmîden tazmîn taleb ederim deyü tasaddî eylediğim da‘vâmdan bâ-tavassut-ı muslihîn mesfûr diğer Karabet zimmî ile kat‘an li’n-nizâ‘ yüz guruş bedel-i medfû‘ ve makbûza ba‘de akdi’l-musâlaha ve’l-kabûl mâ‘adâya ve bi’l-cümle husûs-ı mezkûra ve işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu] Fî 20 Zilka‘de sene [12]55