Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 213 Hüküm no: 283 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Ağa’nın Soğancı Ahmed Ağa’ya olan borcunu ödemesi 972 guruş hüküm Ma‘rûz Soğancı esnâfından Ahmed Ağa b. Mustafa İstanbul Bâb Mahkemesi’nde meclis-i şer‘-i münîrde teba‘adan Mahmud Ağa b. Halil nâm kimesne muvâcehesinde mezbûr Mahmud Ağa zimmetinde semen-i mebî‘den ba‘de külli’l-hesâb gayr-ı ez-teslîmât sahhu’l-bâkī dokuz [yüz] yetmiş iki guruş alacak hakkım olmağla meblağ-ı bâkī-i mezkûru mezbûr Mehmed [Mahmud] Ağa’dan hâlâ taleb ederim deyü da‘vâ ettikde ol dahi cevâbında ber-vech-i muharrer ikrâr lâkin deynim olan meblağ-ı bâkī-i mezkûr dokuz yüz yetmiş iki guruşu karındaşım gāib ani’l-meclis Mustafa nâm kimesne yediyle bundan akdem müdde‘î-i mersûm Ahmed Ağa’ya tamâmen edâ ve teslîm etmişidim deyü müdde‘î-i merkūmun inkârına mukārin eylediği def‘ine ikāmet-i beyyine edemeyip bi’t-taleb mezbûr Ahmed Ağa bi’l-muvâcehe ber-nehc-i şer‘î tahlîf olunmağın mûcebince dâfi‘-i merkūm def‘-i mezkûruyla merkūm Ahmed Ağa[ya] bilâ-beyyine mu‘ârazadan ba‘de’l-men‘ merkūm Mahmud Ağa’nın sâlifü’l-beyân ikrâr ü i‘tirâfı mûcebince lâzım gelen meblağ-ı bâkī-i mezkûr dokuz [yüz] yetmiş iki guruşun müdde‘î-i merkūm Ahmed Ağa’ya edâsıyla mezbûr Mahmud Ağa ilzâm olunduğu mübâşirleri Bâb-ı Seraskerî kavaslarından Mehmed Kavas kulları yediyle huzûr-ı [âlîlerine i‘lâm olundu] Fî 17 Zilka‘de sene [12]55