Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 83 Hüküm no: 80 Orijinal metin no: [17a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İrisi ve Melye kardeşlerin evlerini Ezmerağda’ya sattıkları Medîne-i Üsküdar’a muzâfe Adalar nâhiyesine tâbi‘ Pendik karyesinde mütemekkine İrisi ve Melye ibnetey Mihail Nasrâniyeler taraflarından ber-vech-i âti’l-beyanda vekîlleri olduğu zât-ı mesfûretânı bi’l-ma‘rifeti’ş-şer‘iye ârifân Vasil v. Panayot ve Yamandi v. Togodoş zimmîler şehâdetleriyle sâbitü’l-vekâlesi olan Apostol v. Manol zimmî meclis-i şer‘-i hatîrde işbu râfi‘atü’r-rakīm Ezmerağda bt. Hıristo Nasrâniye muvâcehesinde bi’l-vekâle ikrâr ve takrîr-i kelâm edüp akd-i âti’z-zikrin sudûruna değin müvekkilesi [müvekkileleri] mesfûretânın yedlerinde mülkü olup karye-i mezbûrede vâki‘ bir tarafı Kostandi zimmî avlusu bir tarafı Melye Nasrâniye menzili bir tarafı tarîk-i hâs ve bir tarafı tarîk-i âm ile mahdûd fevkānî iki bâb oda ve tahtında avlu ve kenîf ve sokak kapısını müştemil mülk menzillerini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile müşteriye-i mesfûreye yüz guruşa bey‘ u teslîm ve temlîk eylediklerinde ol dahi ber-vech-i muharrer iştirâ ve tesellüm ve temellük ve kabz u kabûl edüp semeni olan meblağ-ı mezbûr yüz guruşu müşteriye-i mesfûre yedinden müvekkillerim mesfûretân Nasrâniyeler tamâmen ahz ü kabz eyleyüp fîmâ-ba‘d sâlifü’z-zikr menzilde kat‘â ve kātıbeten alâka ve medhalleri kalmayup müşteriye-i mesfûrenin mülk-i müşterâsı ve hakk-ı sırfı olmuşdur keyfe mâ-teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’r-râbi‘ aşer min-şehri Rebî‘i’l-evvel li-sene semânîn ve mi’ete ve elf. Şuhûdü’l-hâl: Osfolya v. Zafiri, Yorgaki v. Sendos, Kostandi v. Kanilo, Todori v. Petro, Aci Simon v. Eksoderi, Andon v. İlya, Tanaş v. Trandafil. Felemmâ ...? kitâbihi fî hâze’l-makām ...? icrâ’i’l-ahkâm Nemekahü’l-fakīr ileyhi azze şânuhu Mehmed Reşid en-nâib bi-nâhiyeti Adalar -gufire leh-. [Mühür] Mehmed 1146