Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 81 Hüküm no: 79 Orijinal metin no: [16b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büyükada’da izinsiz avlanıp havai fişek patlatarak ahaliyi rahatsız eden kişilere mani olunması Kıdvetü’n-nüvvâbi’l-müteşerri‘în Üsküdar kazâsı muzâfâtından Kartal nâhiyesi nâibi mevlânâ ( ) -zîde ilmühû- tevkī‘-i refî‘-i hümâyûn vâsıl olıcak ma‘lûm ola ki Üsküdar’a muzâfe Adalar nâhiyesine tâbi‘ Ada-i kebîr re‘âyâları Südde-i sa‘âdetime arzuhâl edüp birkaç seneden beri Efrenc tâifesinden ba‘zıları mücerred merâkların icrâ içün müsâferet tarîkiyle ada-i merkūma varup nice gûne fesâd ve ta‘addîyâta tasaddî edegeldiklerinden bu sene-i mübârekede dahi yanlarında papaslarıyla varup ada-i mezbûre derûnunda geşt ü güzâr ve evlâd ü iyâllerine ta‘arruz ve envâ‘-ı cevr ü ezâ ve tahrîk ü idlâl eylediklerinden mâ‘adâ av bahânesiyle bağ ve bahçelerini çiğneyip küllî zarâr u ziyân ve evleri arasında tüfeng ve fişenkler atıp iki nefer kızların üzerlerine ateş düşüp âzâları muhterik olup cerrâh yedine giriftâr ve zulm ü ta‘addîlerinin nihâyeti olmadığını bundan akdem arzuhâlleriyle inhâ ve tazallum-ı hâl eylediklerine binâen sâdır olan fermân-ı âlîşâna imtisâlen sen ki mevlânâ-yı mûmâ-ileyhsin mübâşir ta‘yîn [olunan] Abdullah Çavuş -zîde kadruhû- ma‘rifetiyle cerîdede isimleri mastûr on beş neferden mütecâviz kimesneler ile taht-ı hükûmetinizde olan ada-i mezbûra varup Yorgaki nâm zimmînin sagīre kızı Frosni ile Maryora bt. Yanaki nâm Nasrâniye ada-i mezbûrede vâki‘ menzillerinde mahrûk yatdıkları hâlde akd-i meclis-i şer‘ olundukda mesfûr Aci Yanaki ve mesfûre Maryora cevâblarında ada-i mezkûrda müsâfereten mütemekkin Efrenc tâifesinden Arteo nâm Françeli’nin mütemekkin olduğu menzilinde üç aydan beri yapıp cem‘ ve tedârük eylediği vâfir kal‘a tasvîri ve havâi fişenkleri leylen menzillerimiz hâricinde vâki‘ arsada bilâ-izni’ş-şer‘i ve bilâ-emr-i münîf atdırıp mesfûre Maryora kendü menzilimiz avlusunda durur iken bir kebîr havâi top fişengi bana isâbet ve göbeğimden dizlerime ve bacaklarıma varınca ihrâk bi’n-nâr ve mesfûr Yorgaki dahi fişenk-i mezkûr benim dahi mesfûre sagīre kızımın iki ellerini ihrâk eyleyüp keşfolunmasın matlûbumuzdur dediklerinde ada-i mezkûre mütemekkinelerinden hasene ve ihtiyâreden Mariya bt. Yorgi ve Elaki bt. Enucer ve Enciyani bt. Yorgo nâm Nasrâniyeler mahrûka-i mesfûretânın âzâlarına rü’yet ve ber-vech-i muharrer her biri ihrâk olunduklarını haber vermeleriyle ba‘de’l-keşf ve’l-mu‘âyene sâir ahâlî-i ada-i mezbûrdan beş nefer zimmîlerin zevceleri dahi havflarından nâşî bayılıp akılları zâyi‘ olmak rütbesine resîde olduğu zâhir olup ve fişenk atılan mahâlde dahi Manol zimmînin nâm zimmînin mülk bahçesi duvarının pûşîdesinin muhterik olduğu rü’yet olundukdan sonra cemm-i gafîr sâir ahâlî-i adadan meclis-i ma‘kūd-ı mezkûrda Efrenc tâifesinin hâlleri istifsâr olundukda her birleri tazallum-ı hâl edüp el-yevm adamızda Efrenc tâifesinden bir türlü emn ü rahatımız olmayup bağ ve bahçe ve tarlalarımızda sayd ü şikâr kasdıyla mazarrâtları ezyed ve perîşânü’l-hâl olmamıza bâ‘is olduklarından mâ‘adâ atdıkları fişengin her biri semâda ihrâk misâli alâim gösterip bu gûne harekât-ı nâ-bercâda olduklarını ba‘de’l-ihbâr hakīkat-i hâli bi’l-iltimâs tarafından i‘lâm ve re‘âyâ-yı mezbûre dahi bi’d-defa‘ât arzuhâlleriyle mesfûrların ada-i mezbûrdan ihrâclarını istirhâm eylediklerinden hâllerine merhameten fîmâ-ba‘d varmamak üzere mesfûrların emvâl ve eşyâlarıyla ada-i mezbûrdan eğerçi ihrâc ve evlâd ü iyâlleri yed-i tasallutlarından tahlîs olunup ancak mesfûrların ihrâclari’çün yedlerinde senedleri olmamağla fîmâ-ba‘d mesfûrlar ada-i mezbûra varmamak ve bir takrîb ile varırlar ise ihrâc olunmaları’çün bir kıt‘a tuğrâ-yı emr-i şerîfim i‘tâ olunmasın istid‘â-i inâyet eyledikleri ecilden vech-i meşrûh üzere amel olunmak fermânım olmağın imdi eyyâm-ı sa‘âdet-encâmda re‘âyâ fukarâsını şerr ü mekrlerinden tahlîse mezîd-i takyîd ve ihtimâm eylemen bâbında fermân-ı âlîşânım sâdır olmuşdur buyurdum ki hükm-i şerîfim vusûl buldukda ol bâbda vech-i meşrûh üzere şeref yâfte-i sudûr olan [fermân-ı] vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olup hilâfına rızâ ve cevâz göstermeyesin şöyle bilesin alâmet-i şerîfe i‘timâd kılasın. Tahrîren fi’l-evâili Cemâziyelâhir li-seneti tis‘a ve seb‘în ve mi’ete ve elf.