Bab Mahkemesi 397 Numaralı Sicil (H. 1255-1256 / M. 1839-1840) cilt: 95, sayfa: 225 Hüküm no: 302 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hanım’ın geçinemediği kocası Hüseyin Ağa ile muhalaa yoluyla boşandığı Muhâla‘a Ma‘rûz Sâhibe-i arzuhâl mu‘arrefetü’z-zât Fâtıma bt. Süleyman nâm hatun İstanbul Bâb Mahkemesi’nde meclis-i şer‘-i münîrde zevc-i muhâlı‘ı derûn-ı arzuhâlde ismi mezkûr Hüseyin Ağa b. Ali nâm kimesne muvâcehesinde mezbûr Hüseyin Ağa bin guruş mehr-i mu‘accel-i müstevfâ ve altı yüz guruş mehr-i müeccel tesmiyeleriyle zevc-i dâhilim olup lâkin beynimizde hüsn-i mu‘âşeretimiz olmamağla mezbûrun zimmetinde mütekarrir ve ma‘kūdün-aleyh olan mehr-i müeccel-i mezkûrum olan altı yüz guruş ile nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyyete ve ibtidâ-i zevciyyetden işbu târîh-i i‘lâma gelince sâir cemî‘ hukūk-ı şer‘iyyeye müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik deyü ikrâr ve tasdîkleri huzûr-ı [âlîlerine i‘lâm olundu] Fî 20 Zilka‘de sene [12]55